Сумар дня на 21. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 21. вересня/септембра 2026 р.

В Тыляві припомянули 100. річницю вертаня Лемків до православія

В минулу суботу Тыляві прошли торжества для упамятніня 100. річниці вертаня Лемків до православія. Припомнийме, што рішыньом Святого Собору Єпископів Польской Автокефальной Православной Церкви, в 2026 р. споминат ся 100. річницю Повороту Лемків до Православія. Протягом рока ювілей споминат ся підчас свят важных для православных Лемків – торжеств на св. Горі Явір, як і недавно на праздник лемківского святого – священномученика Максима, котрого жывот і мученическа смерт была єдным з фундаментів громадных конверсий на Православія. Суботнє богослужыня в Тыляві навязувало до історичных дій з 1926 р. коли тылявска парохія, як перша, праві в цілости выступила з Грекокатолицкой Церкви, а жытелі звернули ся до варшавского митрополиты Діонісия о долучыня іх до Православной Церкви. В черговых роках явиско обняло десяткы лемківскых сел і довело до громадных тзв. повоторів до віры вітців. Тылява стала символом початку процесу конверсий на Лемковині. Святочну Літургію в Тыляві очелил архієпископ ґорлицкій і перемышльскій Паісий, в асисті чысленного духовенства. По богослужыню владыка Паісий вручыл памятковы медалі вшыткым присутным священникам. Медалі отримали тіж заслужены для єпархіі особы: Ольга Телеп, Петро Павелчак, Петро Трохановскій, Миколай Ґалчык, Ольга і Штефан Урды, Ольга і Роман Борсукы, Томаш Болех і Давид Льорчык. Співал хор Ірмос під ведіньом імости Мариянны Ярой.

Меншыновы выборы в Сербіі

Меншыны в Сербіі выберут сой новых членів нацийональных совітів. Сербскій міністер про людскы права, меншыновы права і социяльный діалоґ Демо Беріша в пятницю 18. вересня/септембра підписал рішыня о выписаню выборів про нове скликаня нацийональных совітів нацийональных меншын. Выборы одбудут ся 8. листопада/новембра. Членів нацийональных совітів буде выберало прямыма выборами 21 нацийональных меншын, в тым Русины. Дрібниці чытайте на нашым портали.

Стріча східніх католицкых єпископів Европы

Од 15. до 19. вересня/септембра в стародавным грекокатолицкым путницкым місци – в Марияповчы на Мадярах прошла Стріча східніх католицкых єпископів Европы, в котрій брало участ близко 50 єпископів, синкелів і діаконів. В стрічы, котра уж стала традицийом і одбыват ся каждого рока, брали участ єпископы і представникы східніх церкви з Мадяр, Словациі, Польщы, Білоруси, Украіны, Румуніі, Пілнічной Македоніі, Сербіі, Австриі, Хорвациі, Німец, Чешской Республикы, Франциі ци Італиі. Тот рік єпископы стрічали ся в місци, котре стало початком той ініциятивы в 1997 р. Центрaльна тема тогорічной Стрічы то: «Наша східня католицка достоменніст і наше свідоцтво на Заході». Веце о стрічы дознате ся з допису на нашым портали.

«Чорно-білый Бескід» Яцка Косібы в Мазярскій Загороді в Лоси

В найблизшу пятницю 25. вересня/септембра в Мазярскій Загороді в Лоси одбуде ся вернісяж выставы фотоґрафіі Яцка Косібы з назвом «Чорно-білый Бескід». Подія пройде в рамках Европейскых Дни Спадковины. Яцек Косіба од декад документує красу архітектуры і природы ґорлицкой землі і Низкого Бескіду. Його фотоґрафіі были презентуваны на выставах в Польщы і на Словациі. Початок вернісажу о о 16.00 год. Выставу буде мож пак обзерати до 20. грудня/децембра тр.