СБУ по разії означіла русиньскый флаґ як флаґ „републікы“. Лож на Русинів

В середу 14-го децембра 2022-го року Служба безпекы Україны (СБУ) робила далшы разії в будинках, якы належать Україньскій православній церькви. СБУ знова означіла церьков як Україньску православну церьков Московского патріархату.

В скорых ранных годинах в тот день безпека зачала робити разію і на теріторії Хресто-Воздвиженьского собору в місті Ужгород, котрого настоятельом є отець Димитрій Сидор, познатый з русиньского руху.

Хоць СБУ офіціално оголосила, же подія была заміряна на проросійску діверзію і далшы з тым повязаны діла, безпечностній службі перешкаджали в Ужгороді русиньскы артефакты.

Флаґ „републікы“

На знимках, котры были публікованы Службов безпекы Україны можеме видіти русиньскый флаґ. Но СБУ в офіціалнім выголошіню пише, же нашли „прапор так званой адміністратівно-теріторіалной єдиніці Републіка Підкарпатьска Русь.“ Што властно СБУ нашла?

Русины офіціално прияли свою сімболіку в рамках Світового конґресу Русинів у 2007-ім році. За свій ерб Русины прияли ерб, котрый в часах меджівойновой Чехословацькой републікы, до котрой складу належала і втогдышня Підкарпатьска Русь, днешня Закарпатьска область Україны, быв ербом земскым, теріторіалным.

Тот самый ерб хоснує і днешня Закарпатьска область Україны, но за свій го прияли і вшыткы Русины світа посередництвом конґресу.

Флаґ быв запропонованый русиньскым ученым, в благій памяти Михаілом Алмашійом, котрый пропоновав лем флаґ у формі, же у верьхній половині є синя фарба, в нижній половині є точно на половину біла і червена фарба. Кедь Світовый конґрес Русинів у 2007-ім році рішыв о народній сімболіці, доїднало ся, же на флаґу буде і высше спомянутый ерб.

Флаґ, котрый нашли на теріторії православного собору, є русиньскый флаґ, і не має нич з „Републіков Підкарпатьска Русь“, котра, по перше, не існує, і по друге, котру не оголошають ани єдна русиньска орґанізація як на Україні, так в іншых країнах.

Навеце, русиньскый флаґ много раз хосновав ся на русиньскых подіях, котры проходили на теріторії Україны, і ниґда не быв властями поважованый за даякый сепаратістічный флаґ, ани Русинам на їх подіях не было заборонено хосновати го.

Наліпка лем.фм, русиньскы співанкы і гімна

І далшы фотоґрафії, котры были публікованы з разії, суть інтересны. Кедьже думаме, же то, што СБУ публіковала, має быти доказом діверзії, спомяньме, што на знимках было.

На фотоґрафіях з разії в Ужгороді было наприклад ЦД русиньского співака Владислава Сивого з назвов Образы із нашого жывота. Проблемов мало быти і найджіня нотації Гімны підкарпатьскых Русинів, котра была зроблена на текст Александра Духновіча, а в меджівойновім періоді ся окрем чеськой і словацькой гімны часто хосновала на Підкарпатьскій Руси при святочных принагодах.

Покля Світовый конґрес Русинів прияв за гімну Русинів Вручаніє од Духновіча, Русины на Підкарпатю паралелно хоснують і гімну з меджівойнового періоду. Но так само не мож бісідовати, же тото має быти інштрумент діверзії і російской пропаґанды, ці якогось сепаратізму.

На фотоґрафіях мож видіти і наліпку нашого радія лем.фм, ці єдну пропозіцію нового русиньского ербу, котра походить з книжкы Мілана Яна Піліпа з назвов Русиньска народна сімболіка, яка вышла на Словакії в році 2014.

Припоминаме, же Піліп довгодобо просаджує зміну сімболікы, головно ербу, котрый бы належав лем Русинам як народу, і не быв повязаный з ербом бывшой Підкарпатьской Руси в рамках Чехословакії. О темі бісідовало ся і на Світовых конґресах Русинів, но дотеперь не было охоты з боку конґресу сімблоліку мінити.

Піліп свойов публікаційов хотів вырішыти і неєднотность хоснованя сімболікы, кедьже много раз хоснує ся неправилно, проблемы суть ці уж з тым, як має вызерати медвідь в ербі, або де має быти ерб на флаґу, кедьже дакотры хоснують флаґ з ербом, котрый не є в середині.

Но в жаднім припаді русиньскый флаґ не быв приятый як флаґ „републікы“, але як флаґ народный.

Проблемов подля СБУ, кедьже то публіковала меджі знимками, є і ікона Собору карпаторуськых святых, не беручі до увагы історічный контекст і то, же „карпаторуськы“ святы суть властно русиньскы святы, не російскы, ці „кремельскы“ святы.

Русины одсудили войну

Припоминаме, же Русины ся такой на початку войны поставили проти ньой. Вшыткы релевантны русиньскы орґанізації на Україні, в европскых країнах і в Северній Америці, в тім чіслі і сам Світовый конґрес Русинів, меджінародна русиньска орґанізація зареґістрована на Словакії, ясно одсудили войну.

Назвали правым меном, хто є аґресором, же є то Російска федерація, а так само высловили свою солідарность з Українцями і вшыткыма далшыма народностями, котры жыють на Україні.

Єдночасно припомянули, же права Русинів мусять быти рішены, Русины на Україні мусять быти признаны, но пріорітов русиньскых орґанізацій є самособов закінчіня несправедливой з боку Російской федерації войны проти Україны, котра ся лем боронить.

Наперек ясній позіції Русинів односно войны, СБУ подля публікованых знимок поважує русиньску сімболіку ці русиньскы співанкы за „огрожіня“ ці „діверзію“. Звернийме увагу і на то, же Світовый конґрес Русинів ниґда не прияв Російску федерацію за члена, хоць намагы о то были.

Україна прияла меншыновый закон

У віторок 13-го децембра 2022-го року Верьховна рада прияла закон о народностных меншынах, котрый є ключовым условієм про вступ до Европской унії.

Депутат парламенту і член комітету про людьскы права, деокупацію і реінтеґрацію дочасно окупованых теріторій, народностны меншыны і меджінародны односины Тарас Тарасенко подля выголошіня публікованого на сайті Верьховной рады Україны припомянув, же його комітет на тім робив два рокы.

Пояснив, же документ шпеціфікує права народностных комуніт на Україні і дає ґаранції їх етнічного і културного розвитку. Подля приобіцяня депутата „на никого ся не забуде і не буде існовати жадна діскрімінація“.

Мы уж лем припоминаме, же діскрімінація існує, кедьже Русины дотеперь не были признаны і їх сімболы теперь стали „проблемов“ про СБУ.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА