З мышы кожух на зиму

„Доказы“, котры СБУ нашла почас разії, яка мала быти заміряна на проросійку пропаґанду, діверзію і діла з тым повязаны, в Хресто-Воздвиженьскім православнім соборі в Ужгороді, суть не потверджіньом діверзії Сидора, але потверджіньом атакованя Русинів.

Лем недавно польске выдавницьтво Libra выдало книжку вызначного русиньского історіка, мімо іншого українознателя, Павла Роберта Маґочія під назвов Україна. О державности і народній ідентіті.

Книжка бывшого председы а сучасного честного председы Світовой рады Русинів є доповненов верзійов експертізы, котра была до Гааґу передложена на Меджінародный судный трібунал. Маґочій, котрый ясно у своїм матеріалі боронить Україну і їй право на існованя, а нелем теперь, по зачатку войны, але свої позіції ясно декларовав уж од окупації Криму, є тот сам Маґочій, котрый стояв на чолі Світового конґресу Русинів, якый у 2007-ім році прияв русиньску народну сімболіку – ерб, флаґ, гімну.

По разії, котра 14-го децембра 2022-го року одбыла ся в ужгородьскім храмі, котрого настоятельом є так само в русиньскім русі познатый православный священик Димитрій Сидор, ся одкрывать вопрос, ці тото має быти подяка Маґочійови і його народу за його намагы боронити Україну перед меджінародным трібуналом.

Не буду детайлно коментовати разії, котры Служба безпекы Україны робить в будинках Україньской православной церькви, но все ся ку тому пише, же глядають діверзантів, проросійску пропаґанду і так далше.

Діверзію пішли глядати і до Сидора. І што нашли? Очековав бы єм, же покля є разія заміряна на высше спомянуты діла, пак суть дві можливости. Прийдеме, найдеме, опублікуєме, же сьме то нашли. Або прийдеме, не найдеме, і втогды треба ясно інформовати, же нич таке ся не нашло.

Што зробила СБУ в припаді русиньского священика? Пришла і нафотила русиньскый флаґ, албум русиньского співака, наліпкы лем.фм, історічны ґазеты… Русиньскый флаґ лжыво означіла за флаґ „Републікы Підкарпатьска Русь“, проблемов была і нотація історічной Гімны підкарпатьскыx Русинів. Так само ікона карпаторуськых, значіть русиньскых святых.

Лем де там є діверзія? Де там є московска пропаґанда? Де є єден єдиный артефакт на знимці, котрый бы потверджовав тото, по што там СБУ ішла? Кедь таке штось нашли, чом то не вказали?

Гей, треба признати, же СБУ нашла і окладку „паспорта“, без внутрішніх сторінок, „Републікы Підкарпатьска Русь“. Але вєдно з тым треба спомянути, же за тоту „PR акцію“ коло паспортів ці незалежности підкарпатьскых Русинів Сидор вже быв свого часу покараный.

По перше, вышмарили го із Світового конґресу Русинів, котрый ся од дачого такого стріктно діштанцовав, і головну роль там знова грав высше споминаный Маґочій. По друге, Сидор быв судженый і быв одсудженый на условну кару.

Дурнота тримати тоту окладку. Але в нормалных країнах за єден і тот самый карный чін мож быти одсудженый раз. Ці на Україні мають новый штандард, і будуть за тото саме судити веце раз? Все як прийдуть до Сидора мож наново зачати суд?

СБУ пришла з тым, же ідуть поїмати велике звіря, з котрого ушыють Українцям кожух на зиму. Но і кедь уж нашли лем мыш, повіли собі, же холем малый кожух на зиму бы з того міг быти.

Русиньскы орґанізації з цілого світа од самого початку войны остро одсудили войну і назвали того, хто є аґресор, і хто ся лем боронить. Высловили свою солідарность з Українов, хоць тота держава доднесь їм не признала права. Русиньскы орґанізації робили благодійны акції, зберали продукты і грошы, жебы помочі людям на Україні, без огляду на їх народность, помагали просто людям в нужді. І чого ся Русины дочекали?

Дочекали ся того, же намісто переоцініня позіції Києва односно русиньского народа і його прав, СБУ робить з русиньского флаґу флаґ неіснуючой і никым нежаданой з боку Русинів републікы, робить з Русинів сепаратістів, одкрывать проти Русинів внутрішній фронт, як кебы не старчів тот реалный на выході країны проти російского аґресора.

Кебы єм хотів робити діверзію і шкодити властній країні, точно так бы єм то робив, жебы зробити шкандал і бунтовати у людей ненависть до даякой ґрупы населіня. Тото была задача СБУ, жебы вєдно з разійов наваляли ведра бруду на Русинів, і збунтовали людей проти них?

Якбач гей, бо не вірю в можливость, же СБУ не знать, же нашли русиньскый флаґ, не флаґ даякой „републікы“, же нашли флаґ, котрый дотеперь хосновав ся на вшыткых русиньскых подіях, котры на Україні проходили, і ниґда то не было жаднов проблемов. Же нашли флаґ, котрый прияла меджінародна русиньска орґанізація в рамках свойой народной сімболікы, а не як сімбол даякой державы.

Бо покля бы єм мав вірити тому, же тот флаґ дотеперь СБУ не виділа на нашых подіях і не знала, же то не „державный“ флаґ, але народный, пак може Київ розпустити ціле СБУ, бо дурнішу безпеку бы сьме не нашли ани в країнах третього світа, а то нияк не хочу ображати країны третього світа.

Ціле то вызерать так, же СБУ пришла з тым, же ідуть поїмати велике звіря, з котрого ушыють Українцям кожух на зиму. Но і кедь уж нашли лем мыш, повіли собі, же холем малый кожух на зиму бы з того міг быти. І опубліковали фоткы русиньскых артефактів із лжывыма коментарями. Тото вам людей загріє? Ненавсить вами бунтована? Хотіло бы ся бити, та сьте нашли кого?

Покля мають быти люди на Україні караны за русиньскы флаґы, є то небезпечный прецеденс, на котрый бы мав реаґовати Світовый конґрес Русинів, але і сам Маґочій. Тихо бы не мав быти ани Брусел, котрый дав Києву штатут кандідата на вступ до Унії.

А Київ бы мав думати на то, же за злочіны, котры діяли ся в рамках войны в бывшій Югославії, пак перед трібуналом в Гаазі судили нелем представителів єдного народа, поважованого за першого аґресора, але вшыткых, котры тоты злочіны почас войны робили. Хочу вірити, же ся Україна ку такым злочінам, проти даякого малого, слабого, мірного народа, не прихылить.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА