План Б і надії фантасты

Стратеґічны планы, планы екзістенціалны, не можуть мати лем єдну, А верзію. Все треба раховати і з планом Б. Русины односно свого вызнаня на Україні не можуть зістати несподіваны, і без другой варіанты.

Русиньскый рух довгодобо бісідує о тім, же підтирмує вступ Україны до Европской унії, бо членство в сполочнім евроклубі, а припадне зрушіня граніць, про такзваный бездержавный народ принесе лем бенефіты. О тім ся Русины пересвідчіли в країнах, котры вже тоты бенефіты мають, і котры помогли ку ліпшій і простішій співпраці нашых орґанізацій.

Але нелем тото было мотівом русиньской підтримкы европской пути про Україну. Рокы ся вірило тому, же Київ буде мусити змінити свою позіцію односно Русинів, признати їм права, признати Русинів за офіціалну народностну меншыну ці корінный народ, покля хоче своє місце в Бруселі.

Бо наівно очековали сьме, же Україна мусить прияти европскы штандарды і в рамках меншыновой політікы, кедь хоче быти „Европов“.

Но вызерать то так, же треба зохабити „глубокый сон“ і в тім припаді, і зачати ся приготовльовати на то, же план А не мусить фунґовати, і Русинам буде треба план Б.

По минулотыждньовых подіях в Ужгороді, коли русиньскый флаґ ці Гімна підкарпатьскых Русинів, яку навеце прияла і Закарпатьска областна рада, стали „проблемов“ про Службу безпекы Україны і доказом „проросійской діверзії“, собі треба усвідомити, же Київ, мінімално в тім часі, ани здалека не роздумує о тім, жебы перестав діскріміновати Русинів, а скоріше наопак, державный орґан хоче з до неба кличучов несправедливостьов іщі веце кріміналізовати Русинів, і їх возродный рух.

Можеме дожыти ся того, же Унія досправды прийме зе члена країну, котра односно Русинів буде далше тримати комуністічно-націоналістічну політіку, а про котру Русины не будуть ани тілько, што порох. Наопак, іщі їх під „оправданыма“ причінами будуть карати і школовати, жебы знали, хто властно суть, тоты недовчены неборакы.

Тот самый Київ, котрый там, де видить, же може українізовати, як наприклад в Сербії, не повість проти Русинів ани пів слова, але іщі їх і фінанчно підтримує, і україньскый амбасадор ся променадує на каждій акції, на котрій бы ся міг дістати на знимку ці відео запис, де бы міг розповідати свої демаґоґії перед русиньсков публіков.

Жебы вернути до темы, при обставинах, котрых сьме свідками, навеце кедь Брусел діскрімінацію Русинів не видить, або не хоче видіти, кедь не видить ани обмеджованя реліґійной слободы у свого кандідата на вступ, треба зачати раховати з тым, же Україна, і кедь не в скорім часовім горізонті (аж такы оптімісты не сьме), може раз стати членом Унії, наперек тому, же демократічны цінности, слободы, права, на якы сьме звыкнены в цівілізованім западнім світі, далше буде обходжати здалека як чорт крест.

Курто повіджено, можеме дожыти ся того, же Унія досправды прийме зе члена країну, котра односно Русинів буде далше тримати комуністічно-націоналістічну політіку, а про котру Русины не будуть ани тілько, што порох. Наопак, іщі їх під „оправданыма“ причінами будуть карати і школовати, жебы знали, хто властно суть, тоты недовчены неборакы.

Не хочу быти пророком, котрый ниґда не оголошать рай, але катастрофы, но маю міцне пересвідчіня, же тото найгірше іщі нас лем може чекати. Навеце з арґументом, же предці Україна – жертва, треба єй зрозуміти.

А будуть то бісідовати точно тоты самы, котры Русинів за веце як тридцять років жертвами не виділи, бо лем треба почекати, оно ся то змінить…

Покля нас чекать то, же Україна далше, безкарно, буде робити свою традічну політіку проти Русинів,  а навеце буде поступати на своїй пути до Унії, пак є на місці звідати ся, якый буде наш план Б. Што зробить Світовый конґрес Русинів, русиньска світова громада, покля Брусел „леґалізує“ діскрімінацію Русинів?

Намісто того, жебы сьме собі робили даремны надії, же може до такого наконець не дійде, буде ліпше, кедь тот план Б зачнеме приготовльовати і реалізовати го.

Бо боротьба з Бруселом може  на кінцю быти іщі гірша як з Києвом. А раховати з підпоров про нас автоматічно, уж днесь, по вшыткім, што сьме виділи, властно, што сьме з боку Брусела не виділи, може лем фантаста.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА