Via Carpatia штораз ближе полудньовой границі. Медже Дукльом а Барвінком буде 11 естакад і 10 мостів

Унійны середкы дозволят побудувати 19-кілометровый одтинок експресовой дорогы С19 медже Дукльом а границьом державы в Барвінку. По словацкій страні зактуализуют студиюм выкональности для дорогы Р4, 60-кілометрового одтинка од польско-словацкой границі.

Перед тыжньом, в пятницю 10. лютого/фебруара в Барвінку підписали порозумліня в справі будовы приграничных одтинків експресовой дорогы С19 трасы Via Carpatia в Низкым Бескіді. Присутны были м.ін. полнячый обовязкы Ґенерального Директора Державных Доріг і Автострад Томаш Жуховскій і його словацкій одповідник Владимір Яцко.

Словак признал, же його держава пізнит ся з інвестицийом, але підкрислял, што трактуют єй пріоритетово, і заповіл стараня, жебы до 2030 рока была готова. Польскій одтинок до Барвінка має быти готовый в 2027 році.

Вызваня для інжынєрів

Підписане порозумліня тыкат дофінансуваня в квоті веце як 326 млн евро – грошы презначены будут на будову 18 км дорогы по польскій страні з Дуклі до Барвінка, а тіж на опрацуваня документациі для близко 60 км на Словациі. Унійне підпертя є важне, бо з огляду на гористый терен буде то коштовный і тяжкій до зреализуваня фраґмент трасы. Має коштувати веце як 1,5 млд зл.

Медже Дукльом а Барвінком заплянували будову 15 естакад, найдолша з них долгости 1,1 км стане на 35-метровых стопах. Побудуют тіж 10 мостів, 6 віадуктів і 6 переходів для звірят. Цікавым видит ся зріжницюваня переходів: штырі заплянували для малых звірят, єдно для середніх і єдно для великых звірят. Дорогу выпосажат в ґратя безпекы дорогового руху та охороны середовиска. Роботы обнимают тіж перебудову і розбудову пілперечных доріг, технічной інфраструктуры і інчого. Побудуют тіж штырі місця до контролі і важыня авт.

700 км Via Carpatia в Польщы

Пут Via Carpatia то основный транспортовый шляк медже Пілнічном а Полудньовом Европом. Чыслит пару тисячів кілометрів. Част дорогы є уж доступна, а част є фурт реализуваня і проєктувана. На обшыри Польщы обнимат 700 км, з чого 260 км єст уж в експлоатациі, а в реализациі є 280 км. Доцільово переходила буде через пят воєвідств: підляшскє, варміньско-мазурскє, мазовєцкє, люблиньскє і підкарпатскє.

136 км Via Carpatia на Словациі

На Словациі Via Carpatia буде чыслила 136 км ескпресовых доріг і автострад. Будут то: експресова дорога Р4 та одтинок автострады Д1 (Пряшів-Кошыцкы Ольшаны) і експресовой дорогы Р2 (обводниця Кошыц), будуваной од марця минулого рока. До побудуваня остал одтинок 60 км од границі з Польщом в Барвінку.

Фот. прес. мат. ҐДДДіА