Нижньошлезска Желізниця буде автобусами возила пасажерів по новых трасах, м.ін. Хоцянів-Пшемків-Радваниці-Ґлоґів

Нижньошлезска Желізниця буде од вересня/септембра возила пасажерів автобусами на трьох новных трасах: з Ліґниці через Злоторыю до Єленьой Горы, з Хоцянова через Пшемків і Радваниці до Ґлоґова, а тіж з Сыцова до Олесниці.

Од 1. вересня/септембра Нижньошлезска Желізниця на трьох трасах в реґіоні урухомит не потяговы, а автобусовы получыня. Фірма уж выпрактикувала такє розвязаня – возила так пасажерів на трасі Клодзко-Лондек-Стронє Шлезскє. Вказало ся, што єст великє заінтересуваня таком формом перевозів од НЖ.

«За шіст місяців схоснувало [таку комунікацию – прип. ред.] 31 тис. пасажерів на семох парах получынь каждого дня» – поінформувал в четвер, 9. марця, на пресовій конференциі віцепрезес НЖ Войцєх Здановскій.

Проєкт ся сподабал, зато рішыли, же будут наступны такы получыня за потяг.

Автобусы за потягы, але доцільово – буде потяг

Маршалок Цезарий Пшыбыльскій пояснят, што хотят бороти ся з комунікацийным выключыньом і выпромувати получыня. «Для жытелів буде то злегшыня в штоденній комунікациі, в дорозі до місц роботы ци школы. Естимуєме, што тоты получыня обоймут коло 55 тис. жытелів» – ствердил маршалок.

До сіти получынь НЖ долучают три новы: з Ліґниці через Злоторыю до Єленьой Горы, з Хоцянова через Пшемків і Радваниці до Ґлоґова, а тіж з Сыцова до Олесниці. Для Ліґниці і Єленьой Горы буде то безпосереднє получыня медже тыма містами. «Тяжко ся до них достати публичным транспортом» – повіл В. Здановскій.

В заложынях новы получыня мают тіж усвідомити подорожуючым, што в будучности на тых трасах буде курсувал потяг. На тепер за получыня в половині заплатит самоуряд воєвідства, в половині самоуряды.

Зміна з Малопольскій Желізниці

Потягы Малопольской Желізниці, што курсуют од стациі Тарнів до Нового Санча і Ясла, од 12. марця будут заступлены автобусовом комунікацийом. В тым примірі іде о продолжыня направы штрекы на желізницьовій леніі но 96 медже Тарновом а Сторожами.

Фірма інформує, што за потягы о найвекшій фреквенциі будут урухомлены найменше два автобусы, єден – што обслугує вшыткы стациі і пристанкы по дорозі, другій – приспішеный.

Зміны в розкладі і заступча автобусова комунікация будут обовязувати до 10. червця/юнія тр.

Фот. Нижньошлезска Желізниця