Меджі словацькыма Татрами і Мушынов знова буде ходити Беляньскый експрес

Облюбленый влак Попрад-Татры – Стара Любовня – Мушына штартує свою літню сезону 3-го юла 2023-го року. Влак буде ходити каждый вікенд аж до 3-го септембра, інформовав Пряшівскый самосправный край.

Тот рік Беляньскый експрес приходить з новотов почас літньой сезоны. Путуючі, котры куплять собі листок на влак, здобудуть знижку єдно евро на навщіву граду Любовня і сканзену, котрый під градом находить ся.

На град зо знижков

Новоту той сезоны приготовив Пряшівскый самосправный край, компанія IDS Východ і Любовняньскый музей. Влак буде кажду суботу і неділю раз іти дополідне з Попраду і Мушыны, а раз пополідне з обидвох желізнічных штацій. Денно так підуть штири влакы.

На штації в Старій Любовні мож схосновати споминаный бонус. Знижка єдно евро на навщіву граду і сканзену платить лем в даный день, коли ідете влаком, і треба вказати опечаткованый листок в влаку. В припаді турістів із Словакії то має быти печатка од ZSSK, турісты з Польщі мають мати печатку од компанії Koleje Malopolskie.

Много атракцій на посмотріня

Од 1-го юла будуть турісты, котры підуть Беляньскым експресом, мочі выужывати в Старій Любовні і автобусовы споїня, котры будуть мати часы одходів до Червеного клаштора ці Пєниньского народного парку приспособлены часам приходів влаків.

Стара Любовня окрім граду і сканзену має і далшы інтересности, котры можуть турісты навщівити. Належыть до них Середньовікый воєньскый табор, Воєньска експозіція Михала Стренка ці Загорода Вікторії, што є найвекше блудиско в середній Европі.

Інтересны суть і недалекый град Плавеч, купелі Вышні Ружбахы ці уж споминаный Червеный клаштор.

Цільовов штаційов Беляньского експресу є Мушына на польскім боці граніці. Купельне місто понукать стародавны памяткы, множество атракцій і лічівы джерела. В Мушыні суть забезпечены і влаковы споїня до купельного міста Криниця.

Великым тяглом є і місто Попрад на Словакії, Кежмарок ці Спішска Бела. З першого з них є недалеко до Татер, далшы дві міста мають много історічных вызначных памяток, як Кежмарьскый град, Деревяный артікуларьный костел в Кежмарку ці музей в Спішскій Белій.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА