Стріча полномічных воєводів дo справ нацийональных і етнічных меншын

В минулым тыжни, 27. і 28. червця/юнія в Варміньско-Мазурскым Воєвідскым Уряді в Ольштыні прошла стріча представників Міністерства Внутрнішніх Справ і Адміністрациі з особами, котры одповідальны сут за справы нацийональных і етнічных меншын та соспільности хоснуючой реґіональный язык в поєдных воєвідствах.

В стрічы участ вязли віцеміністер МВСіА, Блажей Побожый, Воєвода Варміньско-Мазурскій Артур Хоєцкій та інсп. др габ.  Івона Кльоновска, Комендант-Ректор Высшой Школы Поліциі.

Дискусия вчас дводньовой стрічы зосереджала ся головні на квестиях звязаных зо спілпрацом полномічных воєводів з орґанізациями нацийональных і етнічных меншын та орґанізациями, што для них діют.

«Ваша робота, вашы реляциі, безпосередній контакт з репрезентантами нацийональных і етнічных меншын то досправды сутьова справа» – оцінил віцеміністер Блажей Побожый.

Департамент Реліґійных Віроісповідань та Нацийональных і Етнічных Меншын репрезентували Анджей Сосновскій – заступця директора Департаменту, Ґжеґож Журавєцкій – начальник Выділу Нацийональных і Етнічных Меншын, др Малґожата Мілевска – радчыня в департаменті, одповідальна за вводжыня Проґраму інтеґрациі, Катажына Бончковска – головна специялистка в департаменті, та Аркадиюш Станковскій, якій одповідальный єст за систем ЕСУД.

Зобраны выслухали выкладу про правны аспекты медженародных стандардів охороны прав меншын та взяли участ в панели звязаным з темами односячыма ся до системы меншыновой освіты та реализациі Проґраму соспільной і громадяньской інтеґрациі Ромів в Польщы на рокы 2021-2030.

Розумліня польской культуры, через культуры меншын

Вчас стрічы полномічны зазнаємили ся тіж з принципами хоснуваня електронной системы признаваня дотаций – ЕСУД. Презентация была необхідна з увагы на факт, што од найблизшого набору (на 2024 рік) буде мож за посередництвом той системы складати внескы на реализацию задач, котрых цілю є підтриманя культурной достоменности нацийональных і етнічных меншын та реґіонального языка.

Віцешеф МВСіА пікрислил, што в минулым році повело ся в «рекордовый спосіб звекшыти середкы в буджеті на цільовы, підметовы дотациі, значыт як раз безпосередньо для орґанізаций, а тіж для проєктів реализуваных через орґанізациі нацийональных і етнічных меншын та соспільніст хоснуючу реґіональный язык». Як додал, трактує тото як особистый успіх, «але тіж вказаная, што тота част буджету державы єст достерігана урядом» – повіл віцемінітер.

«Маме свідоміст, маме тото переконаня, же проблематика нацийональных меншын, пропаґуваня культруы, розвиваня, плеканя культур меншыновых соспільности, котры складают ся прецін на тото шырше розумліня нашой польской культуры, має великє значыня» – ствердил.

В сумі на 2023 рік міністер признал 456 дотаций на квоту веце як 18 млн зл. «Найвекшыма бенефіциєнтами підметовых і цільовых дотаций сут орґанізациі меншын: німецкой, украіньской, лемківской, кашебской соспільности. Тоты орґанізациі, котрых є найвеце, сут найчысленнійшы або – найенерґічнійше діют» – подал на стрічы Ґжеґож Журавєцкій, начальник Выділу Нацийональных і Етнічных Меншын.

Вельокультурова Вармія

Того рода стрічы што рока проходят в інчым реґіоні. «Місце стрічы, Ольштын, не было припадкове. Вармія і Мазуры то реґіон, котрый од віків замешкували і замешкуют люде вельох нацийональности, віроісповідань і культур. То богатый етнічні реґіон» – подає ся в пресовій інформациі МВСіА.

«Обшыр воєвідства [варміньско-мазурского – прип. ред.] замешкуют особы, што декляруют приналежніст до вшыткых нацийональных і етнічных меншын, за вынятком Караімів. Спосеред них найчысленнійше репрезентувана є украіньска меншына, пак німецка, ромска, білоруска, литовска і росийска» – пише ся в комунікаті.

Дискусию на тему освіты модерувал др Артур Ґурецкій, директор Департаменту Загальной Освіты і Проґрамовых Основ Міністерства Едукациі і Наукы.

Основом роботы полномічного є устава з дня 6. січня 2005 р. о нацийональных і етнічных меншынах та про реґіональный язык. Серед найважнійшых задач є спілпраца з нацийональныма і етнічныма меншынами та урядом обслугуючым міністра властивого до справ реліґійных віроісповідань та нацийональных і етнічных меншын.

Фот. gov.pl