Сумар дня на 6. липця/юлия 2023 р.

Приносиме вам сумар медияльной ґрупы ЛЕМ.фм+ на ден 6. липця/юлия 2023 р.

Талергофскій Ден в ЗША

Лемко Союз в ЗША і Карпаторусиньскій Америцкій Центр Lemko Hall орґанізуют Талергофскій Ден Памяти. Подія одбуде ся 29. липця/юлия в Стемфорд в ЗША в місцевій православній церкви. Упамятніня зачнут ся од молитвы о год. 11.00. Як інформуют орґанізаторы, подія посвячена буде не лем жертам талергофского лаґру з Лемковины, але і взяненым і страдавшым в Центральным Лаґрі Працы в Явожні в наслідстві акциі «Вісла». Панахіду одслужыт лемківскій священник, о. Владимір Горощак. Пак одбуде ся дискусия до темы і лянч. Орґанізаторы просят до участи, а при тым подавати своі зголошыня до 22. липця/юлия. Талергофскій Ден Памяти то єдна з подій, яка єст орґанізувана лемківском еміґрацийом в ЗША.

Модернізация ґорлицкого ледовиска

Неодолгa зачне ся важна інвестиция повязана з модернізацийом ґорлицкого ледовиска – м.ін. задашыня. Працы мали зачати ся уж пару місяців тому, але не мож было найти выконавці. Дотля через брак одповіднього даху, коли лем пригріло сонце, лед ся скоро топил. Проблем был тіж літом, коли в місци ледовиска інчы могли корыстати з тенісовых кортів – кєд ліє дощ, гру треба перервати. Як інформувал заступця бургомайстра Ґорлиц Лукаш Балаєвич, місто підписало уж умовы з выконвацьом, котрым єст фірма Гажбуд. Окрем даху побудуване буде тіж технічне забезпечыня, будут тоалеты, почекальна і місце, де буде мож выпожычыти ґратя. Пінязі на сесу інвестицию походят з тзв. гірского щыту – в сумі 4 мілийоны злотых.

Іконописаня на східній Лемковині

Ґмінный Осередок Культуры в Команчы, Репедскій Осередок Культуры та Осередок Культуры в Щавным рыхтуют варштаты іконописаня. Обудут ся они 11. і 13. липця/юлия – перше о 11.00 год. в Команчы, а пак о 15.00 год. в Репеди. Чысло місц єст органичене, зато орґанізаторы просят о вчаснійшы записы по контакті з Осередками. Вступне дармо. Варштаты сут орґанізуваны в рамках проєкту пн. «Меджепоколіньовы варштаты – лучыт нас спільна культура» з проґраму Культуральна Едукация 2023. Дофінануваня дало тіж м.ін. Міністерство Культуры і Нацийональной Спадковины. Варштаты поведе Ольга Рудлицка.

Просиме до Липника

А уж заран зачынат ся ХІІ Русиньска Ватра в Малым Липнику, якой головным орґанізатором є молодіжне общество Молоды.Русины. Як сме уж інформували, проґрам зачне ся в пятницю о 19.00 год. на головній сцені од школы народного співу з Іваном Брільовом. Пак буде концерт – вечер русиньскых голосів. Суботній головный концерт зачне ся о год. 16.30. Выступувати будут русиньскы колективы, якы представлят цілу мозаіку русиньского реґіону на Словациі. На год. 20.30 заплянуваный єст тематичный проґрам пн. «Вода». Пізным вечером, коло 22.00 год. одбуде ся ефективне розпаліня великой ватры з круговыма танцями. Окрем того вчас цілой подіі буде мож смакувати русиньскы стравы. Не бракне і активности для діти. В неділю орґанізаторы запрашают до участи в грекокатолицкій літургіі, по котрій буде концерт духовной музикы. Приходте чысленно з Лемковины – Малый Липник граничыт до Жеґєстова і Андриівкы. Будеме там і мы!