Соспільны консультациі в Яслі і в Нижній Полянці

Союз Ґмін Басену Вислокы в рамках пянуваного до реализациі трансграничного проєкту веде соспільны консультациі, жебы познати опініі жытелів, підприємців, позаурядовых орґанізаций і вшыткых заінтересуваных задачом. Заувагы мож присылати до 28. вересня/септембра тр.

Проєкт достал названя «Трансгранична спілпраца в обшыри туристикы і культуры на терені ґмін належачых до Союзу Ґмін Басену Вислокы і Пряшівского Самосправного Краю». Партнерами проєкту сут: Союз Ґмін Басену Вислокы з Ґмінами: Біч, Хорківка, Дембовец, Колачиці, Санкова, Сколишын, Тарновец і Містом Ясло вєдно з селами Бехерів, Хмельова, Курів, Луків, Нижня Полянка і орґанізацийом Словацкій Червеный Крест (одділіня Свидник).

Задач на 4 млн евро

Головном цілю проєкту є звекшыти туристичну атракцийніст польско-словацкого реґіону погранича. Хотят то осягнути через активізацию локальной соспільности та через зорґанізуваня публичного простору до креативного діяня при схоснуваню ресурсів культуровой спадковины. А в переложыню на барже приступный язык, означат тото реализацию ріжных задач, м.ін. хотят розбудувати мобільну аплікацию Ґміны Санкова (о природничы і історичны атракциі, тематичны шлякы, печатаня фольдеру і фільму промуючого локальны продукты Ґміны Санкова), допосажыти осередок культуры в Хмельовій, утворити стрефу реляксу в селах Курів, Нижня Полянка і Свидник та зробити інформацийны таблиці на деревяный грекокатолицкій храм – церков покровы свв. Космы і Даміяна в Лукові.

В Бінаровій хотят побудувати пішо-роверову стежку і выремонтувати будинок бывшой народной школы, в Бічы змодернізувати музейный будинок Дом з Баштом, а в Зренціні побудувати видокову вежу з рекреацийном стежком. Місце для рекреациі хотят побудувати в Цеклині.

Окрем того в рамках проєкту будут орґанізувати спільны фестівалі і культурны подіі, варштаты і інчы. Будут хотіти промувати локальны традициі, звыкы, ремесла, свята, леґенды, стиль жытя.

Буджет проєкту выносит 4 мнл евро. Проєкт плянуют реализувати од квітня/апріля 2024 р. до марця 2026 р.

Заувагы до проєкту мож слати через формуляр доступный на сайті проєкту wisloka.pl або особисто в консультацийных пунктах в Яслі і в Нижній Полянці.

Союз Ґмін Басену Вислокы

Союз Ґмін Басену Вислокы зосереджат 22 ґміны з підкарпатского і малопольского воєвідств. Діє од 1998 рока як центр спільных услуг, цілю котрого є здобывати зовнішні фінансуваня, координувати проєкты, спілпрацувати з донаторами і партнерами. Дотепер Союз зреализувал проєкты о вартости веце як 511 млн зл, в рамках котрых повело ся м.ін. побудувати 700 км канализациі, 200 км водопроводів, заінсталювати 9650 солярных системів на приватных будинках і 103 інсталияций на будинках публичного хосну, зробити термомодернізацию шкіл, домів культуры, урядів ци зреализувати проєкты з обшыри еколоґічной едукациі, туристикы і розвитку винарства.

Місийом Союзу є, жебы влияти на розвиок реґіону з пошануваньом природы, прав чловека і при узвглядніню потреб тепер жыючых і будучых поколінь.