Папа Франціск призначів єромонаха Йону (Йосифа) Максима за нового пряшівского архієпіскопа і митрополіту

Святішый Отець Франціск у четверь 26-го октобра 2023-го року, на свято великомученика Димитрія, выменовав нового пряшівского архієпіскопа і митрополіту Ґрекокатолицькой церькви на Словакії.

Став ним єромонах Йона (Йосиф) Максим, дотеперішній іґумен монастыря студітів в Унівскій лаврі. Єромонах Йона походить із русиньского села Ольшавіця в окресі Левоча. Владыка Петро Руснак зіставать апостольскым адміністратором на выконованя звычайной аґенды аж до перевзятя канонічных властей архієпархії новым єпіскопом.

Біоґрафія нового митрополіты

Єромонах Йона народив ся як Йосиф Максим 21-го новембра 1974-го року в Левочі, дітинство пережыв у Ольшавіці.

По ґімназії ішов штудовати на втогдышню Ґрекокатолицьку богословску (днесь теолоґічну) факулту в Пряшові. У 1998-ім році здобыв тітул маґістра теолоґії і в тім самім році почав штудовати на Папскім восточнім інштітуті в Римі, де в році 2000 здобыв ліценціат, а в році 2017 докторат із восточных церьковных штудій.

На священика быв рукоположеный 11-го юла 1998-го року владыком Йоаном Гірком в Пряшові. В роках 2001 аж 2004 быв шпірітуалом у Священьскій семінарії блаженого єпіскопа Павла Петра Ґойдіча в Пряшові, а в роках 2002 аж 2004 і асістентом на Катедрі сістематічной теолоґії Ґрекокатолицькой теолоґічной факулты в Пряшові.

У 2004-ім році одышов на Україну і вступив до Унівской лавры. По закінчіню новіціату там склав вічны монашескы обіты 22-го мая 2008-го року. У 2011-ім році быв выбратый за іґумена філіалного монастыря у Львові, і в році 2020 за іґумена Унівской лавры.

Вертам домів, меджі своїх найблизшых

„Выменованя за пряшівского архієпіскопа і митрополіту ня застигло на Україні, де дію уж майже 20 років. Тото выменованя поважую за прояв великой довіры з боку Церькви і Святішого Отця Франціска, як і за прояв його прихыльности ку Ґрекокатолицькій церькви на Словакії. Приймам то з покоров і слухняностьов,“ пише новый митрополіта у своїм писемнім выражіню.

Владыка номінант подяковав владыкови Петрови Руснакови, котрый веце як рік вів Пряшівску архієпархію як апостольскый адміністратор, причім зістав і братіславскым єпархом. Так само подяковав владыкови Кірілови Васильови а владыкови Міланови Лахови, як і вшыткым емерітным єпіскопам.

„Вертам домів на Словакію, де мам свою родину, сполубратів священиків і віруючіх, з котрыма хочу продовжовати в будованю того, што почали мої попердници. Чую ся як отець, котрый по роках прожытых в чуджіні з причіны повинностей вертать домів меджі своїх найблизшых, жебы тішыв ся із їх успіхів, тішыв їх в болях і слухаючі голос Святого Духа їх допроводив у гляданю Божой правды,“ пише далше новый митрополіта.

Як інформовав, выменованя го застигло в службі іґумена Унівской лавры, зато його приход на Словакію іщі выжадує даякый час, жебы забезпечіти ход монастыря і найти нового іґумена.

Владыка Петро позывать ку вдячности і радости

„Roma locuta, causa finita – Рим ся высловив, діло закінчене,“ высловив ся владыка Петро Руснак, дотеперішній апостольслый адміністратор Пряшівской архієпархії і братіславскый єпарха.

„Я вдячный Святішому Отцьови Франціскови, же выменованьом нового пряшіваского архієпіскопа митрополіты закінчів час очекованя і давать нам у владыкови – номінантови можливость нового початку. Вєдно з нововыменованым пряшівскым архієпіскопом митрополітом Йоном Йосифом Максимом хочеме ціла Ґрекокатолицька митрополітна церьков sui iuris на Словакії выкрочіти з обновленов надійов на стрічу з Хрістом,“ высловив ся владыка Петро.

Владыкови Йонови із сердця заґратуловав, вітать го меджі єпіскопами і тішыть ся на співпрацу. „В його особі нам Господь давать доброго пастыря, зато вшыткых позывам ку вдячности і радости, як і ку молитвам за нововыменованого владыку.“

Друый пряшівскый архієпіскоп і митрополіта

Новый владыка Йона (Йосиф) Максим став за порядком другым пряшівскым архієпіскопом і митрополітом.

30-го януара 2008-го року Вселеньскый Архієрей Венедікт XVI. реорґанізовав Ґрекокатолицьку церьков на Словакії на митрополітну церьков sui iuris із центром в Пряшові. За першого пряшівского архієпікопа і митрополіту выменовав довтогдышнього пряшівского єпарху Йоана Бабяка. Інтронізованый быв 17-го фебруара 2008-го року в Пряшові.

25-го апріля 2022-го року Папа римскый Франціск прияв зречіня ся пастырьского ряджіня Пряшівской архієпархії архієпіскопом і митрополітом Йоаном Бабяком, і за апостольского адміністратора пряшівского архієпархії призначів братіславского єпарху Петра Руснака. Тот по інтронізації нового митрополіты верне до Братіславской єпархії.