Сумар дня на 3. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 3. листопада/новембра 2023 р.

Вірны з Перегримкы потрібуют помочы при ремонті даху церкви

Православна парохія св. Михала Архангела в Перегримці просит о фінансову підпору при ремонті даху на своій понад 100-літній святыни. Выміна покрытя єст конечна, бо як ся вказало – дах церкви єст в барз злым стані, в даякых місцях аж і діравый, што горозит серіозным пошкоджыньом поліхроміі і выпосажыня середины. Што більше необхідне єст достосувати одгромову інсталяцию до теперішніх вымогів. Початок модернізациі не был плянуваный в тогорічным кошторисі, але єст конечный і мусит ся завершыти до кінця того рока. Ціліст прац выцінено вступні на більше як 110 тис. зл. Парохія на тоту ціль отримала дофінансуваня на квоту 95 тис. Додатково при демонтажу старого покрытя вказали ся ґзимсы копул, на котрых тіж находит ся поліхромія. Парохія єст зобовязана одновити і заховати новы елементы, але сут потрібны додатковы середкы, котры вступні выцінено на 10 тис. зл. З той причыны вірны з Перегримкы разом зо своім парохом просят о фінансове спертя. Мотузок до колекты найдете на нашым сайті в днешнім сумарі або на сайті zrzutka.pl – наголовок «Ремонт даху церкви в Перегримці».

«Баба, дідо, мама, няньо – родина разом для екосвіта» – конкурс для жытелів ґміны Польковиці

Бургомайстер Польковиц Лукаш Пузнєцкій просит до участи в меджепоколіньовым конкурсі «Баба, дідо, мама, няньо – родина разом для екосвіта». Конкурс направленый єст на жытелів ґміны Польковиці, а його цілю єст підносити еколоґічну свідоміст серед мешканців та меджепоколіньова інтеґрация. Конкурс має предовшыткым вказати, што просты діяня причыняют ся до поправы стану середовиска. В конкурсі можут взяти участ ансамблі, складаючы ся зо штырьох осіб: єдной дітины, двох дорослых осіб і єдной 50+. Поділеный єст він на дві части, перша то одповіданя на звіданя, а пак участникы, котры перейдут до другого етапу, будут оповідати о простых розвязанях, котры протидіяют змінам климату. Зголошыня приниманы сут до 16. листопада/новембра, а сам конкурс пройде 21. листопада/новембра. Для найліпшых ансамблів орґанізаторы зрыхтували нагороды.

В Щавнику одкрыют лыжный осередок

В ґміні Мушына рыхтуют дальшу туристичну атракцию – в Щавнику побудуют модерный лыжный осередок. Уж од долшого часу бургомайстер Мушыны, Ян Ґольба, старал ся реактивувати осередок в Щавнику, тепер єст то можливе, бо місто нашло інвестора. Ґрупа Польска Кабельна Желізниця (PKL) разом з ґміном Мушына зачнут реактивацию атракциі. Осередок буде діял цілый рік. В пляні єст будова лыжных вытягів, роверовых і лыжнyх трас, паркінґів, ґастрономічных обєктів і аж і будова ґондольовой леніі, котра получыт Щавник з Креницком Яворином. На тоту хвилю не знатя іщы, коли мож сподівати ся одкрытя атракциі, бо спілка дале жде на конечны адміністрацийны позволіня, але уж тепер власти і представникы спілкы переконуют, што буде то найбарже модерный лыжный осередок в Польщы. Реактивация осередка піднесе туристичну вартіст цілого реґіону, а разом з осередками в Пивничній і Крениці створит лыжный комплекс і літній одпочынквый осередок.

«Традицийны звыкы на Ден Андрия»- етноґрафічно-едукацийны варштаты

Музей Дворы Карвациянів і Ґладышів просит до участи в етноґрафічно-едукацийных варштатах пн. «Традицийны звыкы на Ден Андрия». Варштаты будут проходити од 7. до 30. листопада/новембра в 25-особовых ґрупах. На понад годинній стрічы участникы дознают ся м.ін., одкале походит традицийне ворожыня. Охочы прошены сут о скоршу резервацию, вступ 12 зл.

фот. zrzutka.pl