Уповномоченый про меншыны высловив незгоду із злучіньом меншынового фонду

Як сьме вже скоріше інформовали, словацька влада в децембрі пубкіковала План леґіслатівных задач влады СР на рік 2024, в котрім є на місяць юн напланована Пропозіція закона о Фонді на підпору културы, котрой ґестором має быти Міністерство културы.

Приятьом такого закона бы ся зрушыли два існуючі фонды – Фонд на підпору уменя і Фонд на підпору културы народностных меншын, а зробив бы ся єден новый – Фонд на підпору културы.

Свою незгоду із зрушіньом меншынового фонду в четверь 4-го януара 2024-го року выразив і новый уповномоченый влады Словацькой републікы про народностны меншыны Акош Горонь. Інформацію односно свойой позіції ку рушіню окремого меншынового фонду дав на офіціалный сайт уповномоченого на соціалній сіті.

Уповномоченый написав міністерці

„Посеред народностных меншын выкликала неволю пропозіція Міністерства културы о злучіню фондів, што бы значіло фактічне заникнутя Фонду на підпору културы народностных меншын. Тота пропозіція є о то векшым несподіваньом, же подля свого проґрамового выголошіня хоче влада надвязати на способы і орґанізованя підпоры розвитку народностных меншын, котры были практічно провірены в періоді владнутя в роках 2016 – 2020, коли быв фонд основаный,“ написав уповномоченый.

„В остатніх днях єм вже вецераз высловив свою незгоду з пропозіційов і потвердив єм свій інтерес залучіти ся до леґіслатівного процесу. Вчера (3-го януара, позн. ред.) звернув єм ся писмом до міністеркы културы, пані Шімковічовой, в котрім єм выразив страхы з реорґанізації дотеперішніх верейноправных фондів, і пожадав єм о преформулованя задачі в леґіслатівнім плані влады в згоді з Проґрамовым выголошіньом влады,“ написав далше Горонь з тым, же пожадав і о стрічу, на котрій бы собі з міністерков пояснили свої становиска.

Апелує на партіціпацію меншын

Уповномоченый Горонь так само спомянув, же буде апеловати, жебы уж міністерством зряджена робоча ґрупа, в котрій суть участны і представителі народностных меншын, была залучена до приправы новелізації.

„Думам, же без конзултації з народностныма меншынами не може быти приправлена повноцінна пропозіція. Як уповномоченый влады СР про народностны меншыны буду при удільованю дотацій тырвати на захованю партіціпатівных вырішуючіх процесах,“ закінчів Горонь.