Сумар дня на 19. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 19. лютого/фебруара 2024 р.

Проєкт уставы в справі узнаня Шлезаків за етнічну меншыну

Европосол Новой Лівиці Лукаш Когут перед тыжньом заповіл, што в 2024 році до Сойму трафит проєкт уставы в справі узнаня Шлезаків за етнічну меншыну. Припомнийме, што актуально устава вычыслят лем штырі етнічны меншыны: лемківску, караімску, ромску і татарску. Вычыслят тіж девят нацийональных меншын та єден реґіональный язык – кашебскій. В січни/януарі 2024 р. до Сойму трафил посольскій проєкт утавы в справі узнаня шлезского языка за реґіональный язык. Попертя той ініциятивы заповіли скорше лідеры парляментарной векшыны, значыт Громадяньской Коаліциі, Третьой Дорогы і Новой Лівиці. Дебата на тоту тему має подля слів Лукаша Когута пройти на першым марцьовым засіданю Сойму. Веце на тоту тему в дописі на нашым портали.

Выступуваня ендемічной травы заблокувало реализацию великой інвестициі в Мушыні

Не буде крытого лыжного схылу в Мушыні. Тема його будовы явила ся першыраз іщы в 2013 р., мал ся находити на пограничы Злоцкого і Астрябика. Там плянувано будову трас, готелів і получыня терену з лыжныма атракциями на Креницкій Яворині. Інвестицию заблокувала Ґенеральна Дирекция Охороны Середовиска, котра рішыла, што будова обєкту загорозит волкам і медведям. Воєвідскій Адміністрацийный Суд одкликал товды некорыстне для Мушыны рішыня, але ґенеральный директор охороны середивиска продолжыл спротив і зложыл касацийну скарґу. Долгы судовы процесы спричынили, што заграничны інвесторы стратили терпеливіст і не повело ся зреализувати проєкту. Тема вернула зас два рокы тому і спочатку здавало ся, же вкінцы інвестиция рушыт до переду. На жаль, вшытко вказує на тото, же і тепер ся не поведе. Як подал бургомайстер Мушыны Ян Ґольба – Ґенеральна Дирекция Охороны Середовиска рішыла, што лыжный схыл не може ся там находити, кєд же на луках росне ендемічна трава. За бургомайстом Ґольбом, то не перша інвестиция в ґміні, котрой не даст ся зреализувати зо взгляду на безвзглядны процедуры в державі. Подібно єст з ґондольовом колейком на гору Мальник, де в остатніх роках побудували видокову вежу. Ґенеральна Дирекция Охороны Середовиска опізнят реализацию проєкту, зато што єдна підпора колейкы находит ся в обшыри «Натура».

Конец ремонту басену в Высовій уж неодолга

В тоты вакациі буде мож ся уж купати в Высовій. Як подал війт Збіґнєв Людвін, ремонт тамтышнього басену повинен ся завершыти на зламі липця/юлия і серпня/авґуста тр. Тырвают косметичны працы. Остали іщы додатковы працы на зовни басену, тє. малюваня, чыщыня, выбудуваня тиролькы і пляцу до выпочынку. Басен был побудуваный в 2012 р. за понад 10 млн злотых. По 8 роках фунґуваня был запертый. Кошт тырваючых актуально ремонтовых прац то близко 5,5 млн злотых.

Зміна руху на ронді в Польковицях

Ґміна Польковиці інформує о зміні в руху на ронді. З огляду на початок другого етапу прац звязаных з перебудовом ронда на скрижуваню Алеі Яна Павла ІІ і Алеі Юзефа Пілсудского та улиці Кардинала Болеслава Коминка, од середы 21. лютого/фебруара орґанізация руху буде тымчасово змінена. Закрыта буде східня дорога Алеі Пілсудско і половина входу ул. Кардинала Коминка. Цілый двосторонный рух буде ішол зрыхтуваном західньом стороном воєвідской дорогы з выіздом на алею Яна Павла ІІ. На вході ул. Кардинала Коминка буде обовязувал рух в єдным напрямі (выізд з центру).