Сумар дня 29. квітня/апріля 2024 р

Приносиме вам сумар медияльной ґрупы ЛЕМ.фм+ на ден 29. квітня/апріля 2024 р.

Президентка Словациі одвиділа русиньскій театр

Президентка Словацкой Республикы Зузана Чапутова одвиділа русиньскій Театр Александра Духновича. Президентка в тыжни од 22. до 26. квітня/апріля тр. выбрала за місце свого урядуваня місто Кошыці. В четвер 25. квітня/апріля мала свою робочу аґенду в Пряшові. А не забыла при тым ани на русиньску нацийональну меншыну. Історично першый раз голова державы одвиділа русиньскій Театр Александра Духновича, котрый є єдином русиньском професийональном сценом в світі. Голова державы подякувала робітникам театру, же утримуют русиньскій язык і культуру посередництвом професийональной театральной сцены. Як інформувала по стрічы Чапутова, бесідували «(…) головно о утримуваню і розвитку культуры Русинів, котры на заході сут важном меншыном. І як раз тот театр, ак єдиный професийональный театр на світі, котрый грат в русиньскым языку, має в жытю Русинів на Словациі незаступну ролю». В тот сам ден вечером в Кошыцях одбыла ся в Касарнях Культурпарку дискусия з президентком, на котру были запрошены особности з західньой Словациі з ріжных области. Президентка зас не забыла ани на Русинів. Делеґация Русинів мала шумне чысло, а в дискусиі было іх чути бодай найвеце. Більше на тоту тему прочытате в дописі на нашым портали.

Польскій Сойм вызнал реґіональный шлезскій язык

В пятницю 26. квітня/апріля тр. польскій Сойм схвалил закон вызнаючый шлезскій язык як реґіональный язык. За голосувало 236 посланців, проти было 186, а 5 стримало ся од голосу. Згідно з законом шлезскій язык має быти вписаный до закону о нацийональных і етнічных меншынах як другій – при кашебскым языку – реґіональный язык. Дає то м.ін. можніст введіня до шкіл добровільных занять зо шлеского языка, монтуваня двоязычных таблиц з назвами місцевости, де хоснуваня шлезского деклярує понад 20% жытелів, дофінансуваня діяльности звязаной з захованьом шлезского языка, ци введіня до Спільной Комісиі Уряду та Нацийональных і Етнічных Меншын двох представників осіб хоснуючых шлезскій язык.

20. річниця обновліня св. Йоана Кресителя

З нагоды 20 років од обновліня Общества св. Йоана Кресителя буде в суботу 4. мая тр. о 10.00 год. в грекокатолицкым Катедральным Соборі св. Йоана Крестителя в Пряшові, вєдно з архієпископом і митрополитом Йоном, одправляна благодарна Служба Божа. Проґрам торжества буде продолжал о 12.00 год. в Словацкым Нацийональным Музею – Музею Русиньской Культуры в Пряшові. Общество св. Йоана Крестителя было основане Александром Духновичом іщы в 1862 р. і істнувало до 1874. Пак было обновлене в 2003 р. і зареґіструване Міністерством Культуры Словацкой Республикы в 2004 р. Головным цільом Общества є розвивати християньскє і культурнє жытя Русинів на Словациі.

Польковицкій Фестіваль Землі 2024

В минулым тыжни в Польковицях проходил Польковицкій Фестіваль Землі 2024 під гослом «Чысте повітря, ліпшый климат». Взяли в ним участ ученикы предшкіль і основных шкіл. В орґанізацию екофестівалю влучыли ся м.ін. Звязок Ґмін Мідьового Басену, Польковицка Долина Рецилінґу, Підприємсто Містной Господаркы, Містна Страж, Центр Культуры і Містно-Ґмінна Публична Бібліотека. Были м.ін. варштаты еколоґічной моды, експерименты з сухым ледом, конкурсы і спортовы змаганя.