Сумар дня 14. мая 2024 р.

Приносиме вам сумар медияльной ґрупы ЛЕМ.фм+ на ден 14. мая 2024 р.

Вмер Яков Кішюгас, вызначный діяч серед Русинів Войводины

Як інформувала аґентура Рутенпрес, 9. мая – маючы 75 років – вмер др Яков Кішюгас, професор росийского языка, вызначный діяч серед Русинів Войводины. Яков Кішюгас народил ся в 1948 році в Рускым Керестурі. По студиях зачал вчыти русиньского языка в ґімназиі як раз в Рускым Керестурі. Значный період свого професийного жывота присвятил русиньскому языкови як педаґоґ, але тіж автор ци спілавтор підручників для основной школы з навчальным русиньскым языком або навчаньом русиньского языка. Діял і як професор на Одділіню русиністикы Університету в Новым Саді. Працувал в Міністерстві освіты, де дозерал шкільных стандардів. За свою освітньо-педаґоґічну роботу был нагородженый Святосавском нагородом, а тіж і двараз Нагородом часопису про науку, літературу і культуру «Шветлосц», котрый публикує рисиньскє выдавництво «Рускє слово». Вічна памят!

В Чертіжным одкрыли Цмонтір рисиньскых особности

В неділю 12. мая в селі Чертіжне, меджелабірскій окрес, прошла торжественна подія – грекокатолицка парохія святкувала храмовый праздник Вознесіня Господа. В молитвах з вірныма участ взял пряшівскій архієпископ і митрополита Высокопреосвященый Йона Максим. По торжественній літургіі вірны пішли помолити ся на цмонтір, де похованы сут вызначны русиньскы особности, а котрый в остатнім часі был ремонтуваный, жебы святочно одкрыти Цмонтір рисиньскых особности села Чертіжне. Реконструкция цмонтеря то спільне діло Грекокатолицкой Парохіі Чертіжне і Містнóй орґанізациі Русиньской оброды на Словациі в Меджелабірцях. В часі подіі голос забрали: отец Душан Храпчак, котрый споминал похованых на цмонтері, отец Мілян Ясик, староста села Петро Трічак і Володимір Противняк, председа Містной орґанізації Русиньской оброды на Словациі. Подія закінчыла ся одкрытьом таблиці і панахідом, котру вюл кыр Йона.

В Польковицях урухомили дижуры радных

Од днес мож буде посмотріти на сайті ґміны в календар дижурів і кєд дахто має даку справу до радных – буде міг прити і побесідувати. Радны будут дижурувати в віторкы в годинах од 16.00 до 17.00. Першый дижур єст уж днес, а жытелів міста принимал буде радный Аркадиюш Бльох. Як передал ведучый Містецкой Рады в Польковицях, надіє, што жытелі будут приходити зо своіма проблемами ци думками. што дозволит раді зосердити ся на тых найважнійшых квестиях. Што важне, дижуруючый радный прийме мешканців без взгляду на округ, з котрого был выбраный. З каждой такой стрічы списуваный буде протокіл, а внескы будут передаваны новому бургомайстрови до розсмотріня.

Дария Шкурат, єдна з найліпшых лыжных бігачок глядат спонсорів

Вчера 13. мая Дария Шкурат, родом з Бортного, взяла участ в стрічы з війтом Ґміны Санкова, Малґожатом Малух. Дария єст єдном з найліпшых в своій катеґориі лыжных бігачок в цілій Польщы. На тоту хвилю репрезентує Спортовый Клюб Хохолів. О єй спортовых результатах і успіхах можна долго бесідувати, о чым найліпше свідчыт статус члена Нацийональной Кадры. Єднак заанґажуваня в спорт на так высокым рівни вяже ся тіж з великыма коштами, зато актуально Дария глядат спонсорів, котры так як і ґміна Санкова будут підперати єй карєру, через фундуваня стипендиі, котра дозволит на дальшый розвиток і тренінґы.

фот. ґміна Санкова