Сумар дня на 21. мая 2024 р.

Приносиме вам сумар медияльной ґрупы ЛЕМ.фм+ на ден 21. мая 2024 р.

Ювілейный 15. Сойм Русиньской Оброды на Словациі

В неділю 19. мая в Старій Любовни прошол ювілейный 15. Сойм Русиньской Оброды на Словациі – найстаршой пореволуцийной орґанізациі Русинів на Словациі. Подія зачала ся од музичной части і привитаня присутных через ведучого РОС Мартіна Караша. За столом президиі сойму, окрем ведучого, засіли члены Выконного Выбору, Петро Микула і Володимір Противняк, Петро Медвідь (представник пресового орґану РОС) та Вєра Юрічова і Мірон Крайкович з Дозорной Рады. Вчас засіданя Караш одчытал протокіл о діялности орґанізациі од посліднього сойму. В тым часі РОС орґанізувала многє чысло подій, стріч і конкурсів, бесідувано тіж о выдаваных книжках і музичных альбумах. Єдном з ключовых активности было заанґажуваня в спілпрацу з інчыма орґанізациями в рамках Округлого Стола Русинів Словациі при реализациі кампаніи при Списуваню жытелів в 2021 р. На конец ведучый РОС подякувал вшыткым заанґажуваным – членам, політикам, як і орґанізациям зо Словациі і другых держав за спільну працу. В рамках подякувань передал символичны памятны плякєты. Друга част стрічы зачала ся од економічного підсумунваня діяльности орґанізациі, а пак прошла дискусия членів сойму, де бесідувано о думках на будуче та рішено о змінах в діяню орґанізациі. На конец прошли выборы до Выконного выбору РОС і Дозорной Рады та на становиско ведучого- котрым єдномысельно зас лишыл ся Мартін Караш. Полна реалиция з 15. засіданя сойму РОС находит ся на нашым сайті.

«Низкій Бескід. Загыблый світ»

Підкарпатска Реґіональна Туристична Орґанізация разом з партнерами просят на фестіваль «Низкій Бескід. Загыблый світ». Подія пройде од 17. до 23. червця/юнія. Орґанізаторы участникам оферуют многє чысло атракций од біциґльовых райдів і пішых прогульок слідами Лемків по фінальну подій в вікенд 21.-23. червця/юнія, котре пройде в Рудавці Рыманівскій, Рыманові і на вершку Примірок. Не бракне тіж музичных атракций, в тым спільного співаня при ватрі на Примірках, де мож буде прити вчас нічного райду, концерту в амфітеатрті в Риманові, ци конкурсу туристичной співанкы. Додатковы атракциі зрыхтуваны сут тіж для наймолодшых участників. А зато, што фестівал0 припадат в час найкоротшой ночы в році, участникы будут мати змогу познати тіж собітковы звыкы і традициі. Гев орґанізаторы запропонували собіткову параду в околиці неістнуючого уж села Волтушова, варштаты робліня віночків ци гляданя квітя папороти. В проґрамі подіі нашли ся тіж тереновы гры, зілярскы варштату і кулинарный фестіваль «бескідскых смаків». Плян подіі найдете на сайті орґанізациі.

«Чуда Польщы 2024» серед номінуваных Яслиска і Мушына

Зачал ся конкурс часопису National Geographic Travel «Чуда Польщы 2024». Редакция номінувала 48 кандидатів – по три з каждого воєвідства – то туристичны пути, видоковы пункты ци натуральны місця, але тіж цілы улиці, села, як і загороды. Як передал ведучый редактор, што рока гляданы сут такы місця в Польщы, котры сут перлинами, захоплюют не лем аргітектуром ци історийом, але мают тіж модерну форму. Серед номінуваных находят ся Яслиска в підкарпатскым воєвідстві, ново выремонтуваный Замок в Мушыні з Малопольского Воєвідства ци православный скіт в Одринках в підляшскым воєвідстві. Голосувати може каждый до 5. червця/юнія через інтернетовый сайт часопису National Geographic Travel.

В Польковицях підписали умову про дофінансуваня 5. едициі проєкту «Шпрыха»

Бургомайстер міста Польковиці Вєслав Вабік підписал умову о спілпрацы з презесом заряду Sandenu Марком Коженьовскым при реализациі 5. едициі проєкту «Шпрыха». Як підкрислил презес заряду, фірма од 20 років істнує в Польковицях і од самого початку сперат розвиток міста, як і еколоґічны ініцятивы. Офіцийне розпочатя тогорічной едициі «шпрыхы» прошло початком мая. Жытелі міста можут хоснувати 70 біциґлів находячых ся в 26 стациях в цілым місті.

Повязаны дописы

Сумар дня на 8. мая 2025 р.

Сумар дня на 7. мая 2025 р.

Łemkowie są…