Сумар дня на 8. липця/юлия 2024 р.

Приносиме вам сумар медияльной ґрупы ЛЕМ.фм+ на ден 8. липця/юлия 2024 р.

Стріча в Рускій Бурсі

В минулу суботу 6. липця/юлия в Рускій Бурсі прошли языковы варштаты. Занятя вюл Демко Трохановскій, якій каждый тыжден веде в радию популярну авдицию «Слововиця», а скорше через рокы провадил радийову передачу «Языковый Гокус Покус». Пак стріча продолжала в рамках одкрытой бесіды редакцийного колективу ЛЕМ.фм. Скорше, перед полудньом, стрітили сме ся на святій Горі Явір, жебы помолити ся за душу основателя радия ЛЕМ.фм Богдана Ґамбаля, котрого четверта річниця смерти прошла 2. липця/юлия. Богдан Ґамбаль анґажувал ся в лемківскє одроджыня уж од кінця 80. років минулого столітя. Был м.ін. спілосновательом першой повоєнной лемківской орґанізациі – Стоваришыня Лемків та реактиватором найстаршой нашой орґанізациі в Польщы – Стоваришыня «Руска Бурса» в Ґорлицях. Был тіж аніматором сильной спілпрацы медже Русинами вшыткых держав.

ХІІІ Русиньска Ватра в Малым Липнику

Уж в тым тыжни, в днях од 12. до 14. липця/юлия проходила буде ХІІІ Русиньска Ватра в Малым Липнику на Пряшівскій Руси. Проґрам зачне ся в пятницю по 18.00 год. Буде перегляд дітячых фольклорных колективів і лавреатів послідніх річників фестівалю «Співы мого роду». Звіздом того вечера буде русиньскій солиста Штефан Штець, якій выступит зо свойом ґрупом Файта. Суботній проґрам на головній сцені зачне ся о год. 16.30. В тот ден выступлят колективы з реґіону і близкой околиці, як і тоты з кус дальшой, м.ін. Черговчан з Бардийова, Маковиця зо Свидника, ци Борєвка з Кошыц. Кульмінацийным пунктом суботнього проґраму буде великє паліня ватры. Пак буде забава з народном музиком і фольклорныма колективами. Не бракне і додатковых атракций, такых як выстава фороґрафій Міляна Маласта «Молитва дерева», дротарскы творчы варштаты, ци школа танця. Окрем того буде мож послухати про язык як част достоменности народу ци переміны русиньского облечыня в просторі і часі. В ґастрозоні буде мож скоштувати реґіональне ідло. Буде і специяльна зона для діти, де активности для наймолодшых будут вести акторы з Театру Александра Духновича. В послідній ден ватры, в грекокатолицкым храмі святых Космы і Даміяна одслужена буде Літургія, а пак духовны пісні заспіват Івана Бріллова.

Амфітеатр в Креници уж выбудуваный

Завершыли ся будовляны працы при амфітеатрі в Креници, якій находит ся при нижній стациі колейкы на Паркову Гору. Новый обєкт жде на технічне одобраня. Іщы в тоты вакациі одбудут ся там першы культурны подіі, м.ін. Фестіваль ім. Яна Кєпуры. Кошт будовы обєкту то 20 млн злотых. Середкы в высокости близко 10 млн походят з проґраму «Польскій Лад», а решту доложено з буджету міста. Частично задашена конструкция навязує стильом до забытковых будинків при Бульварах Дітля. В авдиториі єст місце для 1000 осіб, з того 300 задашеных. Дотля в курорті бракувало такого місця до орґанізациі великых імпрез і фестівалів, найчастійше хоснувана была розкладана сцена.

Kонцерт в Пшемкові

Пшемківскій Осередок Куьтуры і Бібліоотека та Кружок Стоваришыня Лемків в Пшемкові просят на концерт фольклорного ансамблю Павличенко з Саскатун в Канаді з участю Лемківского Ансамблю Пісні і Танця «Ластіовчка». Концерт одбуде ся в найближшу неділю 14. липця/юлия о 16.00 год. в Пшемківскым Осередку Культуры.