Сумар дня на 15. липця/юлия 2024 р.

Приносиме вам сумар медияльной ґрупы ЛЕМ.фм+ на ден 15. липця/юлия 2024 р.

Признаны дотациі з додаткового набору МВСіА

Міністерство Внутрішніх Справ і Адміністрациі рішыло в справі признаня дотаций на реализацию в 2024 р. задач маючых на ціли охорону, захованя і розвиток достоменности нацийональных і етнічных меншын та розвиток реґіональныочо языка, в рамках додаткового набору оферт, оголошеного кінцьом квітня/апріля тр. Дотациі на дакотры задачы отримали і лемківскы орґанізациі. Стоваришыня Лемків отримало дотацию на підметову діяльніст та цільовы дотациі на двомісячник «Бесіда», ХІІ Медженародне Бієнале Лемківской/Русиньской Культуры, діяльніст Лемківского Ансамблю Пісні і Танця «Ластівочка» і Дітячого Ансамблю «Ластівчата» і Нашу Світлицю. Стоваришыня «Руска Бурса» в Ґорлицях отримало дотацию на задачу «Малюванкы для наймолодшых», а Товариство для Розвитку Музею Лемківской Культуры в Зындрановій на закуп експонатів материяльной культурной дідовизны Лемків та бібліотечных публикаций і часописів.

Полномічный Нижньошлезского Воєводы стрітил ся з представниками меншын

В четвер 11. липця/юлия тр. полномічный Нижньошлезского Воєводы до справ Нацийональных і Етнічных Меншын Войцєх Скшыпчак гостил представників орґанізаций нацийональных і етнічных меншын – «Республика, річ спільна, Одкрытіст і діалоґ, Пошануваня для культуровой ріжнорідности». Вельогодинна стріча была нагодом до створіня простору для спілпрацы і бесіды з представниками нацийональных і етнічных меншын на тему плеканя свойой культуры, языка і спільой істориі на Нижнім Шлезску. Представникы запрезентували своі орґанізациі, а пак бесідувано м.ін. о проґрамах спертя з Міністерства Внутрішніх Справ і Адміністрациі, потребах і актуальных справых, з якыма наштоден стрічают ся представникы меншын в нижньошлезскым воєвідстві. Дискусия тыкала і квестий спільных прав і обовязків, діянь для інтеґрациі меншын з векшыном соспільства та ініциятив маючых на ціли зміцніня спілпрацы медже ріжныма етнічныма і нацийональныма ґрупами. Бесідувано тіж о промоциі языка, культуры і традиций меншын, прим. через культурны подіі. Дальша така стріча мала бы ся одбыти в наступным кварталі.

Пропамятна подія в Воли Миховій

В Воли Миховій одбыла ся в середу 10. липця/юлия пропамятна подія в річницю масового морду з часів ІІ світовой войны. 10 липця/юлия 1942 р. німецкы нацисты забили там векшыну жыдівскых жытелів околиці – около 150 осіб, предовшыткым жены, діти і старшых. Мужчыны были забраны до лаґру працы в Заславі. Як припомнула Йоанна Потачек з Центру Діалоґу Медже Реліґіями і Народами, Воля Михова то днес невеликє село, але іщы в XVIII ст. то было мале, вельокультурове місточко. Іщы перед войном был там ґалицийскій рынок, склепы, корчмы, дві синаґоґы і церков. Пак Жыдів замордувано, а Лемкы были одтамале выгнаны. На давным жыдівскым цмонтері в Воли Миховій остало близко 30 мацев. Найстарша, котру повело ся одчытати, єст з 1761 р.

Грекокатолицкє поломництво на святу Гору Явір

Заран рушыт грекокатолицкє поломництво в місце обявліня Богородиці на святій Горі Явір. Потырват оно штырі дни. Зачне ся св. Літургійом в церкви в Розділю. Пак поломникы підут через Ропицю Выжню, Маластів, Прислоп, Новицю, Ліщыны, Кункову, Устя Рускє, Квятон і Ганчову. В пятницю 19. липця/юлия придут до Высовой і выйдут на святу Гору Явір. О год. 9.30 буде там служеный молебен до Пресвятой Богородиці, а о 10.00 год. Понтифікальна Літургія з процесийом вколо каплиці.