Сумар дня на 25. липця/юлия 2024 р.

Приносиме вам сумар медияльной ґрупы ЛЕМ.фм+ на ден 25. липця/юлия 2024 р.

В наступный вікенд 44. Лемківска Ватра на Чужыні

В наступный вікенд, в днях од 2. до 4. серпня/авґуста в Михалові на Нижнім Шлеску одбуде ся 44. Лемківска Ватра на Чужыні, якой орґанізатором є Стоваришыня Лемків. Проґрам зачне ся в пятницю о 19.00 год. Пак буде офіцияльне розпаліня Ватры найстаршым лемківскым жытельом Михалова. Першыраз тота почестна функция припаде Михалови Канючкови. До влонишньой Ватры єй старостом, якій клал оген, был Ярослав Шляхтич, якій помер початком 2024 р. В пятницю на сцені видіти буде мож такы ансамблі як Серенча, Бурян і Демай. В суботу выступлят м.ін. Лемко Тавер, Надія, Інтраде і Лемкус. Специяльныма гістми тогорічной Ватры будут два ансамблі з Пряшівской Руси, якы запрезентуют автентичный русиньскій фольклор з Уличской Долины. То Полонина і Стужыця, якы в рамках свого выступліня вкажут і обряд русиньского весіля. В суботу передвиджено і шор конкурсів, спортовых змагань і інчых акций.

Пропамятный Крест в Вафці

Слідом другых лемківскых сел пішли і потомны Вафчан, выгнаны з рідной землі в 1947 р. Подія повязанa з посвячыньом Пропамятного Креста, якій станул на давным нашым цмонтери в Вафці, одбыла ся 18. липця/юлия. Ініциятива одкрытя місця памяти вышла од потомных Вафчан. В тым ціли кінцьом 2023 р. были збераны грошы на поставліня креста. Крест, якій посвячено того літа, станул на давным лемківскым цмонтери, на котрым до выгнаня хоронено Вафчан. Богослужыня очелил владыка Аркадий (Трохановскій), єпископ ольштыньско-ґданьскій грекокатолицкой Церкви в Польщы, якого рід по матери выходит як раз з того невеликого села на західній Лемковині. Участ в посвячыню Пропамятного Креста взял тіж о. Петро Качмар, парох грекокатолицкых парохій в Лоси, Новици, Прислопі і Панкній. В спільній молитві взял участ вікарий теперішньой римокатолицкой парохіі во Фльорицні, о. Мариюш Вжесіньскій. Присутны были і представникы локальных власти. В часі богослужыня спомнено на памят вшыткых похороненых на місцевым цмонтери, але самособом і на вшыткы жертвы депортацийной акциі «Вісла». Інскрипция на памятнику є в двох языках – по лемківскы і по польскы. Находит ся тіж цитат по церковнославяньскы.

Дискусиі і прелекциі на михалівскій Ватрі

Вертаме іщы з інформациями, што тыкают 44. Лемківской Ватры на Чужыні. В суботнім проґрамі заплянувано і стрічы – доповіди, якы будут проходити в Шатрі Бесід. О своім проєкті «Біла Вода – Біль непамяти» оповідят краківскы студенты Домініка Цєпляк і Каміль Федериґа. Пак прелекцию выголосит Даміян Новак з Музею Бічской Землі. Темом буде доля церкви на Лемковині од ХІХ до ХХІ ст. Выклады, а при тым і інчы свобідны бесіды будут проходити в специяльно зрыхтуваным шатрі, котре напевно найдете на ватровиску. Не бракне і нас – редакторів радия ЛЕМ.фм. Як каждого рока будеме для Вас. Будете годны придбати цікавы лемківскы книжкы, цедечка, кошелькы і інчы ґаджеты.

Митрополитарный Собор Пітсбуржской Єпархіі

Высокопреосвященный Вілиям Скурла, пітсбуржскій архієпископ і митрополита, голова Митрополитарной Русиньской Грекокатолицкой Церкви в Зъєднаных Штатах Америкы оголосил скликаня Митрополитарного Собору. Собор має проходити в днях 16.-20. липця/юлия 2025 р. в храмі Пречыстой Дівы Мариі в Вайтінґу, штат Індіана. Митрополитарны церкви свого права (sui iuris) мают подля Кодексу канонів східніх церкви обовязок скликувати собор найменше раз за пят років. Послідній собор пітсбуржской митрополиі проходил в 2013 році, коли на ним як гіст брал участ і владыка Ніль Лущак, помічный єпископ мукачівской єпархіі. Подля офіцияльного писма підписаного кыр Вілиямом з 10. липця/юлия, уж тепер проходят приготовліня на тоту важну подію, на котрій стрітят ся єпископы, священникы, монашество і лаікы пітсбуржской митрополиі, але певністю і дальшы гості з церкви русиньской традициі.