Над Гостовіцями припомянули собі павшых у Великій войні

Павшых вояків із Першой світовой войны собі в суботу 27-го юла 2024-го року, день перед 110-ов річніцьов їй початку, припомянули над русиньскым селом Гостовіці в окресі Снина.

Турістічный поход прямовав на місця, де проходили у 1915-ім році бої, при котрых вмерли тісячі вояків. Як про аґентуру TASR повів Мартін Дробняк – председа Клубу воєньской історії Бескіды, турістічный поход орґанізовали уж девятый раз при нагоді початку Великой войны.

Все послідню юлову суботу приходять до Гостовіць турісты з близкой і шырокой околіці, жебы абсолвовати поход по слідах вояків. Тот рік на нім брало участь штиридцять людей із Словакії і Польщі.

„Нултый річник турістічного походу на верьх Скоры одбыв ся у 2015-ім році. Втогды і выникла думка збудовати nа бойовім полю дзвоніцю, котра буде припоминати павшых вояків. Выбудованя зреалізовало ся у 2016-ім році і є сполочнов ініціатівов Клубу воєньской історії Бескіды і села Гостовіці,“ повів Дробняк.  Дзвоніця, котра є сім кілометрів од села, є доступна посередництвом значеного турістічного пішника.

Завершіньом шторічного путованя є пєтный акт коло дзвоніці на верьху Скоры, котрый орґанізує ся із підпоров Озброєных сил Словацькой републікы.

Коло Гостовіць бої проходили в роках 1914 і 1915, причім найінтензiвнішы были в апрілю 1915-го року. Жертвы кырвавых боїв доднесь припоминать дакілько памяток в околіці, наприклад войновый цінтерь в Гостовіцях і в селі Паризівці, або кріпта ці войновый цінтерь в селі Осадне.