Сумар дня на 16. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 16. серпня/авґуста 2024 р.

Ремонт забытковой церкви в Ждыни – потрібне фінансове спертя

Православна Парохія в Ждыни хоче провести ремонтово-консерваторскы працы при забытковій ждыньскій церкви. По дакількох роках старань парохіі повело ся достати дофінансуваня з Проґраму Охороны Забытків на консерваторскій ремонт пн. Ремонтовы працы при даху і елевациі разом з выконаньом опаскового дренажу при забытковій Православній Церкви Покровы Пресвятой Богородиці в Ждыни. Отримане дофінансуваня, на жаль, не покрыват вшыткых коштів звязаных з реализацийом заплянуваной парохійом задачы. Окрем оплачыня выконавці прац (кошторис значучо перебільшат квоту отриманого дофінансуваня) остают і великы фінансовы зобовязаня звязаны зо зрыхтуваньом проєктовой документациі, створіньом проґраму консерваторскых робіт, проведіньом коштовных археолоґічно-одкрывковых досліджынь та отриманьом вшелеякых позволінь – тоты кошты парохія мусит покрыти з власных середків. На тот момент понесены кошты значучо перекрачают фінансовы можливости ждыньской парохіі, зато не будут в силі провести заплянуваных ремонтів без спертя ззовни. Жертвы мож вплачати м.ін. через інтернетову колекту на сайті zrzutka.pl пн. „Prace remontowo-konserwatorskie przy cerkwi prawosławnej p.w. Opieki Matki Bożej w Żdyni”. Невелика православна соспільніст в Ждыни рахує лем 15 родин. Церков находит ся в історичній части лемківского села, де родил ся і был крещеный Священномученик Максим Ґорлицкій.

Посвятили обновлены воєнны цмонтері в Репейові і Янківцях

Обновлены цмонтері з І світовой войны в селі Репеів в окресі Меджелабірці і селі Янкiвцi, гуменьского окресу, были в віторок 13. серпня/авґуста святочно посвячены. В рамках обновы были на цмонтерях збудуваны новы памятникы з менами похованых вояків. Як подал председа Клюбу воєньской істориі Бескіды Мартін Дробняк, посвячыня приправили во співпрацы з селами Янківці, Репеів і Нижня Полянка, бардиівского окресу. Было реализуване в тісній співпрацы з Озброєныма силами Словацкой Республикы. Більше на тоту тему прочытате в дописі на нашым портали.

Запора під Польковицями буде найвысша в Польщы

На Нижнім Шлезку, під Польковицями фурт росне запора на штучным резервуарі ”Желізный Міст”. Терен належыт до KGHM, громаджены сут там одпады, котры походят з выдобываных концерном руд міди. До недавна был то єден резервуар, але од 2021 одпады трафляют і до другого, меншого аквену. Актуально земны запоры докола резервуарів сут долгы на 20 км, іх высокіст то од 20 аж до 70 м, а до того фурт сут надбудовуваны. KGHM Польска Мід рахує, што до 2037 р. высокіст запоры в найвысшым пункті сягне аж і 114 м. Актуально найвысша тама в Польщы находит ся в Бєщадах на ріці Сан і творит Солиньскє Озеро. Запора тота має 82 метры высокости. Значыт тото, што правдоподібно іщы перед кінцьом наступной декады запора під Польковицями стане ся найвысшым того типу обєктом в Польщы.

Одкрытя новой атракциі в Креници

В пятницю 23. серпня/авґуста пройде офіціяльне одкрытя креницкого амфітеатру, якій находит ся при нижній стациі колейкы на Паркову Гору. Уж в минулым тыжни одбыли ся там першы подіі звязаны з Фестівальом ім. Яна Кєпуры. Кошт інвестициі то 20 млн злотых. Частично задашена конструкция амфітеатру навязує стильом до забытковых будинків при Бульварах Дітля. В авдиториі єст місце для 1000 осіб, з того 300 задашеных. Дотля в Креници бракувало такого місця до орґанізациі великых імпрез і фестівалів, найчастійше хоснувана была розкладана сцена.