Сумар дня на 13. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 13. вересня/септембра 2024 р.

Закінчыл ся першый етап реставруваня цінного іконостасу

Выгорлятскій Музей в Гуменным закінчыл першый етап реставруваня іконостасу з деревяной церкви святого Михала Архістратига, яка была збудувана в 1764 році в Новоселици, сниньского окресу. В 1974 році храм был перенесеный як першый обєкт до Експозициі народной архітектуры і бываня (скансену) Выгорлятского Музею. Іконостас першыраз был реставруваный при перенесіню храму до Гуменного. Влияньом часу і експонуваня є моментально пошкоджена вытварна і архітектонічна част. Цільом першого етапу реализациі проєкту было реставруваня трьох зо штырьох ікон головного шору іконостасу – іконы святого Миколая, Богородиці і Христа, вєдно з архітектуром. Дрібниці чытайте в дописі на нашым портали.

«Лемківскє Співаня” одкликане

Центр Культуры Ґміны Рудна поінформувал, што на жаль не одбуде ся заранішнє «Лемківскє Співаня”. Подія была одкликана з причыны проґнозуваных сильных опадів дощу і погіршыня хвилі, з огляду на безпеку участників. Дальша едиция «Лемківского співаня», якой головным орґанізатором сут лемківскы жытелі Высокой і ґміна Рудна, мала проходити заран на Высокій коло Рудной.

Выклад і выстава з нагоды 80. річниці карпатско-дукляньской операциі

Історичный Музей – Палац в Дукли просит на выклад проф. Анджея Олейко пн. «Парашутным слідом. Дукля, якой не знаме». Выклад буде полученый з часовом выставом пн. «Операция карпатско-дукляньска – ретроспекция 80 років пізнійше». Подія одбуде ся в найблизшый четвер 19. вересня/септембра о 17.00 год. в Палаци в Дукли. Подія вписує ся в святкуваня 80. річниці карпатско-дукляньской операциі, што орґанізуваны сут Повітовым Староством в Коросні, Ґміном Дукля і Ґміном Заршын 4. жолтня/октобра тр.

Показ реконструкциі боів з ІІ світовой войны в Калинові

Село Калинів в окресі Меджелабірці просит на показ реконструкциі боів з ІІ світовой войны. Вказаны будут заєдно наземны борбы, як і тоты, котры проходили в повітри – схоснуваных буде до того 5 аероплянів. Реконструкция одбуде ся в найблизшу суботу 21. вересня/септембра на початку села Калинів о год 14.30. А уж од полудня в Калинові буде мож обзерати демонстрациі технік наземных сил і повітряных збройных сил Словацкой Республикы.

Фестіваль «Культура Карпат» в Тисній

Заран в Тисній пройде друга едиция фестівалю «Культура Карпат». На подію просят Ґміна Тисна та Ґмінный Центр Культуры і Еколоґіі в Тисній. Цілю подіі єст промоция карпатской культуры, особливо традиций Лемків і Бойків. В пляні фестівалю находят ся варштаты гончарства, етнокерамікы, карпатской біжутериі, музичны і кулінарны. Участны будут мочы видіти і выставу «Світ Лемків і Бойків» (выдавництва Libra) ци взяти участ в авторскій стрічы з др. Лукашом Байдом автором книжкы «Бєщады. Тото, што найважнійше». Орґанізаторы задбали тіж про музичну оправу. На сцені запрезентуют ся ансамблі презентуючы традицийну музику, ансамбль Лопянка, Лем Мы, Відимо і Оркєстра Святого Миколая.