Сумар дня на 1. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 1. жолтня/октобра 2024 р.

Роверовый райд Маґурского Нацийонального Парку «Ровером через погранича»

Маґурскій Нацийональный Парк четвертый уж раз просит до участи в роверовым райді «Ровером через погранича». Як і в попередніх роках, райд зачне ся 9. жолтня/октобра і закінчыт 15. листопада/новембра. Не змінила ся тіж і формула конкурсу. В рамках райду треба переіхати індивідуально або в ґрупі єдну з вызначеных орґанізатором трас. Пропонуваны стежкы переізду находят ся не лем на обшыри Парку, але тіж і в сусідуючых ґмінах та в околиці села Нижня Полянка на Словациі. Того рока райдовы трасы нашли ся тіж і на пілнічній страні Парку. 200 першых участників, якы переіхают мін. 10 км вызначеной трасы і удокументуют то слідом GPS та додатково перешлют 5 знимок з характеристичных пунктів на трасі, отримат Памятковый Пакєт. Додатково орґанізаторы припоминают стрічы при ватрі з представником Гірской Охотничой Ратунковой Службы, котра пройде 12. жолтня/октобра в Фолюшы. Список трас і пунктів, де треба зробити знимку, та реґулямін райду находят ся на сайті Маґурского Нацийонального Парку.

В Высочанах святкували 600-років села

28. вересня/септембра прошло торжественне святкуваня 600-років села Высочаны, положеного в ґміні Команча. Ювілейны торжества зачали ся од службы божой в грекокатолицкій церкви Св. Параскєвы в Высочанах, котру правил Митрополита Перемышльско-Варшавскій Грекокатолицкой Церкви ахієпископ Євген (Попович). По службі посвятили памяткову таблицю зо словами Йоана Павла ІІ. В рамках святкуваня мож было взяти участ в роверовым райді ци обізрити конны показы, або закупити дашто на кєрмешы артистичных выробів ручной роботы. Окрем запрошеных гости в подіі участ взяли тіж потомкы родин выселеных з Высочан по ІІ світові войні.

Ґміна Команча має нове партнерскє місто

Ґміна Команча підписала партнерскє догваріня з місточком Мала Іда, злокализуваным в кошыцкым краю на Словациі. В торжертвенным підписаню порозумліня участ взяли війт ґміны Команча Роман Бздик і старостка міста Мала Іда Яна Калльова. Основом спілпрацы буде ініциюваня та підтримуваня взаємных контактів в обшырях культуры і едукациі, особливо як іде о підтримуваня традиций обох держав. Цілю партнерства єст тіж взаємна поміч при розвитку туристикы, в тым спорту і рекреациі, загальный економічный розвиток, спертя при проєктах тыкаючых медженародной помочы і спілпрацы, як і пожарничой безпекы.

Осінны варштаты в Еколоґічным Осередку Едукациі в Ожынній

Еколоґічный Осередок Едукациі в Ожынній просит діти і молодіж до участи в двох осінніх подіях. На початку жолтня/октобра молодіж старша од 14 рока жытя буде могла участвувати в кулінарных варштатах «Од заренця до хліба», котры пройдут 5. жолтня/октобра, або в історичных варштатах «Лемковина, барска конфедерация, І і ІІ світова война» орґанізуваных ден пізнійше. Для молодшых участників в віку од 9 до 13 років Осередок зрыхтувал вікендовы астрономічны варштаты в терміні 12.-13. жолтня/октобра. Участ в варштатах єст дармова, єднак обовязуют скоршы записы. Дрібниці находят ся на сайті Еколоґічного Осередка Едукациі в Ожынній.

«Три церквы- три концерты»

Юзеф Скжек, композитор, мультіінструменталиста і лідер ансамблю SBB, просит на три концерты в трьох бєщадскых церквах. Артиста заграт в церкви Покровы Божой Матеры в Балигороді, Михала Арханела в Выстрым і св. Параскєвы в Лопянці. Юзеф Скжек запрезентує ся на електронічных інструментах в творах скомпонуваных спецяльні на тоту подію до поезиі Єжы Гарасимовича. Додатково в концертах участ возме хор «Cantanti» під ведіньом Михала Серґіюша Мєжеєвского. Три концерты пройдут в суботу 5. жолтня/октобра в Балигороді, в неділю 6. в Быстрым і в понедільок 7. в Лопянці.