Папа призначів єпіскопа про Єпархію Фінікс. Отець Артур Бубневіч є родаком із Перечина

Як інформовав портал Vatican News, 8-го новембра 2024-го року, на праздник Собора святого Архістратига Михаіла і остатніх безтілесных сил, у Ватікані было оголошено, же Папа Римскый Франціск призначів за нового правлячого єпіскопа Єпархії Фінікс отця Артура Бубневіча, дотеперішнього пароха Парохії Матери Божой Безпрестанной Помочі в Албукерке, в Новім Мексіку.

Єпархія Фінікс належыть до русиньской Піттсбурзьской митрполії, котра є наслідничков Мукачовской єпархії і Ужгородьской унії. Єпархіалный столець у Фініксі быв вакантный – без єпархы, од 2021-го року, коли з причіны віку зрік ся свойой функції і одышов на емерітуру владыка Джон Пазак.

Владыка-номінант Артур Бубневіч народив ся 22-го юна 1975-го року в Перечині, на Підкарпатю. Вступив до семінарії Мукачовской єпархії в Ужгороді, і в роках 1996 аж 2001 штудовав теолоґію, наперед в Ужгороді, пізніше на Меджінароднім теолоґічнім інштітуті про штудіум манжелства і родины в автрійскім Ґамінґу.

В роках 2006 аж 2013 быв секретарьом про проєкты в канцеларії Мукачовской єпархії, і єдночасно співпрацовав з владыком Міланом Шашіком при формованю молодежи і навчаню анґліцького языка.

В септембрі 2013-го року на запрошіня владыкы Джералда Діна, втогдышнього єпархы Фініксу, з благословліньом владыкы Мілана Шашіка, пішов служыти до Єпархії Фінікс. 9-го марца 2014-го року быв рукоположеный на діакона, і 14-го септембра того самого року быв рукоположеный на священика.

За пароха Парохії Матери Божой Безпрестанной Помочі в Албукерке, в Новім Мексіку, быв призначеный 1-го децембра 2014-го року. Дотеперь быв і членом Єпархіалной рады у справах покликань а Меджієпархіалной комісії у справах молодежи.

В Піттсбурзській митрополії, яка є наслідничков Ужгородьской унії, діє много священиків із Словакії, Мадярьска і Підкарпатя.