Сумар дня на 20. січня/януара 2025 р.

Приносиме вам сумар медияльной ґрупы ЛЕМ.фм+ на ден 20. січня/януара 2025 р.

Діґітализация Архіву Руской Бурсы / етап 4

В 2024 році Стоваришыня «Руска Бурса» в Ґорлицях реализувало проєкт пн. «Діґітализация Архіву Руской Бурсы / етап 4» фінансуваный Міністром Внутрішніх Справ і Адміністрациі. На тым етапі проведено консерваторскы роботы, котрыма перше заняла ся інтроліґаторска працовня в Новым Санчы. Книгы прошли процес очыщаня, зшытя і оправліня при захованю ориґінальных окладинок, зас ушкоджены страны індивідуальні законсервувано. Дальше забезпечены книгы прошли процес одквашаня в Клініці Паперя при Ягайлоньскій Бібліотеці в Кракові, што дозволит продолжыти час жытя книг, очыщено папір і зміцнено го. В наступным етапі книгы будут науково опрацуваны і здіґітализуваны, жебы уможнити одкрытый доступ вшыткым заінтересуваным. Переданых і забезпеченых было 13 парохіяльных книг, серед котрых найстаршы походят з ХVIII ст. На нашым сайті можете чытати полну реляцию з реализациі того етапу проєкту, як і допис о істориі книг і тым, як трафили до Бурсы.

В зимовы вакациі не буде потягу з Ясла до Крениці

Того рока не буде зимовой реляциі потягу «Włóczykij» з Ясла до Крениці. Потяг од років курсує в вакацийным часі і тішыт ся великом популярністю. З той причыны явила ся думка одкрыти зимову едицию получыня «Włóczykij», в рамках котрой проведено пілотажовый проґрам переізду потягу. Як передал Адам Філяр, член стоваришыня Kolej na Jasło, того рока ани не внескувано до Маршалківского Уряду одкрыти зимову реляцию, зато же получыня не єст оплачальне. Чысло осіб, што скористали з потягу зимом, было заскакаючо мале. Як додає Філяр, може то быти спричынене браком одповіднього наголосніня атракциі. На тоту хвилю тырвают бесіды о продолжыню курсуваня потягу «Włóczykij» в вакациі, так жебы іздил не лем в липци/юлию і серпни/авґусті, але тіж в вересни/септембрі.

Конец ремонту желізницьовой стациі в Команчы

Ґміна Команча закінчыла ремонт перенятой од PKP желізницьовой стациі. В будинку найде ся тепер дім культуры, бібліотека, пункт туристичной інформациі і історично-реґіональна ізба. Лишыт ся тіж простір для пасажерів, бо ґміна рахує на збільшене чысло пасажерскых переіздів, в тым переіздів на Словацию. Як передал війт ґміны Команча, Роман Бздик, в історично-реґіональній ізбі найде ся експозиция артефактів звязаных головні з І світовом войном, позысканы в часі археолоґічных прац реализуваных Ягайлоньскым Університетом. Новый будинок желізницьовой стациі буде одданый до хоснуваня в марци.

Карпатска стріча: Колядуваня на Гуцульщыні

Карпатскє Товариство просит на першу в тым році стрічу з циклю «Карпатскых стріч», котра пройде в четвер 23. січня/януара. Присвячена буде колядуваню на Гуцульщыні і поведе єй др Юстина Чонстка-Клапита, етномузиколожка і антроположка культуры з Ягайлоньского Університету, авторка выдатной моноґрафіі «Колядуваня на Гуцульщыні». В часі подіі мож буде послухати о богатій і ріжнорідній традициі колядуваня, котра дале єст культивувана. Стріча пройде в інтернетовій формі на плятформі ZOOM о 19.00 год. Трансмісию з подіі мож буде обзерати на плятформі YouTube, а награня пак буде опубликуване на портали karpaccy.pl.