Сумар дня на 27. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 27. лютого/фебруара 2025 р.

В Клокочові засідат Рада Єрархів Грекокатолицкой Церкви на Словациі

Днес і заран в Клокочові на Пряшівщыні проходит засіданя Рады Єрархів Грекокатолицкой Митрополитарной Церкви на Словациі. Рада єрархів єст орґаном митрополитарной церкви, і єй членами сут вшыткы єпископы – єпархіяльны, помінчы і емеритуваны. Головом є пряшівскій архієпископ і митрополита. Рада єрархів може выдавати законы і нормы партикулярного права церкви sui iuris – свого права. Засіданя в Клокочові буде уж 38. засіданьом Рады Єрархів Грекокатолицкой Митрополитарной Церкви на Словациі.

Дві новы інвестициі в ґміні Санкова

В віторок, 25. лютого/фебруара, в Уряді Ґміны Санкова підписали умову на реализацию двох важных інвестиций тыкаючых модернізациі водопроводной сіти в Вапенным і Санковій. Перша з них обнимат модернізацию і перебудову сіти в Вапенным на долгости близко 1400 метрів та розбудову стациі уздатняня воды. Вартіст той інвестиці то 2,3 мілийона злотых, а а передвидуваный час реализациі то 9 місяців. Друга зачада тыкат модернізациі перепомповни воды та схоснуваня інтеліґентных системів заряджаня і моніторуваня водопроводной сіти в Санковій. Кошт того проєкту то близко 970 тисячів злотых, а час реализациі то так само 9 місяців.

Нова стация на пути Ліґниця-Вроцлав

В червци/юнію на желізницьовым пути Ліґниця-Вроцлав прибуде єдна додаткова стация. То будуваный тепер пристанок в Куніцах під Ліґницьом. Стация буде з паркінґом, якій помістит 40 авт. Інвестиция є реализувана в рамках Урядового проґраму будовы або модернізациі желізницьовых пристанків за рокы 2021-2025. Єй кошт то 6,8 мілийона злотых. Першы стараня о побудуваня новой стациі зачали ся уж 4 рокы тому, а інвестицийны роботы зачали ся в серпни/авґусті 2024 р. і фурт тырвают.

Поломництво копальників на Святу Гору Явір

Як інформує православна парохія Святой Тройці в Любіні, мож ся уж записувати до участи в першым поломництві копальників на Святу Гору Ґрабарку. Поломництво нижньошлезскых копальників обуде ся аж в серпни/авґусті – на праздник Преображыня Господнього, з благословліня владыкы Юрия, архієпископа вроцлавско-щеціньской єпархіі Польской Автокефальной Православной Церкви. Владыка Юрий призначыл капеляна для копальників, якым єст о. прот. Богдан Репела, любіньскій парох. Поломничество своім патронатом обняла компанія KGHM. Детальный його проґрам найдете на сайті любіньской парохіі.