Сумар дня на 6. марця 2025 р.

Приносиме вам сумар медияльной ґрупы ЛЕМ.фм+ на ден 6. марця 2025 р.

Беатифікация што раз ближе

Мукачівска Грекокатолицка Єпархія приготовлює ся до беатифікациі слугы Божого Петра Павла Ороса. Новомученик буде выголошеный за блаженного в селі Білкы 3. мая 2025 р. 11. марця з той нагоды одбуде ся церковно-історична конференция пн.«Жывот і мученицка смерт слугы Божого Петра Павла Ороса». Конференция одбуде ся в Грекокатолицкым Центрі ім. Елеміра Ортутая в Берегові, і рефераты на ній будут чытати домашні вчены, як і гості з Мадяр і Словациі. Конференцию своім приговором одкрыє преосвященный владыка Теодор Мацапула – мукачівскій єпарха. З домашніх реферуючых мож спомнути історика Володиміра Фенича. З Мадяр выступлят Томаш Вегше, Дьордь Янка і Бернардетт Янка-Пушкаш, вшыткы з Ніредьгазы. Свій реферат буде мал і отец архімандрита Марко Дурляк – протосинкєль пряшівской архієпархіі. Слуга Божый Петро Павел Орос (1917-1953) был священником мукачівской грекокатолицкой єпархіі, якій был вбитый совітскым міліциянтом.

Ведуча Руской Бурсы репрезентує Лемків в Катальоніі

Языковы активісты, а тіж бадачы языка і культуровой достоменности з Европы і Африкы стрічают ся на спільных варштатах в Катальоніі. Єст то можливе завдякы спілправы Lingua Pax і Центра Заанґажуваных Досліджынь над Культуровым Тырваньом на Выділі «Artes Liberales» Варшавского Університету. Участ в варштатах бере м.ін. Наталия Малецка-Новак, ведуча Стоваришыня «Руска Бурса» в Ґорлицях, яка репрезентує Лемків. Окрем ней участ берут представникы Катальонців, Аранів, Берберів, Дзуків, Кашебів, Сардинців, Шлезаків і Вілямівян. Головном темом варштатів єст меджепоколіньова криза в хоснуваню корінных і зміноритизуваных языків і вызваня звязаны з передаваньом языка. Варштаты, презентациі, прелекциі і дискусиі осіб заанґажуваных в жытя спільноты мают помочы в імплементациі найліпшых розвязань до штоденных практик так в домашній, як і публичній сфері. Вчера Руска Бурса інформувала, што єй ведуча выголосила презентацию на тему лемківского языка.

Русиньскій Книжковый Фестіваль

Днес в Музею Русиньской Культуры в Пряшові одкрытый є Русиньскій Книжковый Фестіваль, в рамках котрого мож выслухати лекцию Валерия Падяка. Як за музей інформувала Яна Трущыньска, Музей уж традицийно в марци орґанізує Русиньскій Книжковый Фестіваль і презентує новы русиньскы выданя. Того рока припомнены будут і три ювілеі. Днес мож выслухати доповід під назвом Русиньскы великаны oчами Валерия Падяка, якій зверне увагу на три особы і ювілеі – 190 років од народжыня Анатолия Кралицкого, 160 років од смерти Александра Духновича, і 50 років од смерти Олены Мандич-Шіналі.

Буде нове рондо в Ґорлицях

В ґорлицкым старостві підписано догваріня о будові ронда на крижівці улиц 11 Листопада, Корчака і Бардиівской. Інвестиция має на ціли поправу безпекы і руху в тій части Ґорлиц. В підписаню взяли участ Мирослав Вальонґ, ґорлицкій староста, та Рафал Кукля, бургомайстер Ґорлиц. Будова ронда то результат спільной ініциятивы міста і повіту. Інвестиция буде спілфінансувана з зовнішніх середків в рамках Европейскых Фондів для Маполопольщы 2021-2027, заряджаных Зарядом Малопольского Воєвідства. Кошт інвестициі то близко 6,6 мілийона злотых.