Высокопреосвященый Йона передав Чірчу ікону Богородіці – Квіт Нетлінный

Як інформовав Інформачный центер Пряшівской архієпархії, в неділю 16-го марца 2025-го року одбыв ся вызначный момент в духовнім жывоті віруючіх Ґрекокатолицькой парохії Чірч.

Высокопресовященый Йона Максим, пряшівскый архієпіскоп і митрополіта в тот день передав парохії, котра є архієпархіалным одпустовым місцьом, Ікону Пресвятой Богородіці з назвов Квіт Нетлінный.

Віруючі хотіли свою чудотворну ікону

Торжество почало процесійов з іконов од фары до храму. По приході до Храму Покровы Пресвятой Богородіці была ікона кір Йоном посвячена, пак наслідовала торжественна літурґія.

Владыка в проповіді бісідовав о історії зъявлінь, котры одбыли ся в селі Чірч, і припомянув тугу містных віруючіх мати Маріяньску гору і чудотворну ікону Матери Божой, жебы особніше могли учтити єй. Кір Йона далше підкреслив, же Церьков посередництвом іконы оддає почливость Пресвятій Богородіці як тій, котра дає жывот, зато має і імя Квіт Нетлінный.

Высокопреосвященый припомянув і то, же віруючі в селі Чірч мають скушеность з приятьом віры од своїх предків, а зато мають і одповідность тоту віру передати далшым поколіням, і привести свої діти ку Божой Матери.

По Божескій літурґії, почас молитвы Акафісту ку Пресвятій Богородіці, віруючі приступали ку новій посвяченій іконі, котру ціловали.

На задній стороні іконы, котру голова Ґрекокатолицькой церькви на Словакії передав Чірчу, є ним руков написане по церьковнославяньскы Радуйся цвѢте нетлѢнїя. Так само по русиньскы, латиніков є там написане: „Пречіста Діва, котру народ Божый в Чірчу любить і прославляє, най николи не залишыть місце сіє.“ Під текстом є дата і підпис митрополіты.

Історія путницького місця Чірч

Одпусты в селі Чірч суть повязаны із діями в році 1898, о котрых в кроніці парохії отець Мірон Подгаєцькый написав:

„Двом чірчскым дівкам, котры пасли коровы під Углисками, появив ся якыйсь старець, котрый їм дав вопрос, ці бы не хотіли, жебы ту приходило вельо людей на одпусты. По згоді дівок старець запхав паліцю до землі і на тім місці вытріскло жрідло воды із лічівыма силами. Старець жадав, жебы там была збудована каплічка.“

Коли дівчата в селі повіли, што ся їм стало, стрітили ся із непорозуміньом. Од того часу в селі были погромы, котры завершыли ся великыма зливами. Аж по них село вырішыло збудовати на місці зъявліня каплічку, котру присвятили Успенію Пресвятой Богородіці. Люди почали там приходити і одбыло ся там веце чудесных выздоровлінь. Пак там люди збудовали іщі єдну каплічку.

У 1973-ім році была до інтерьєру каплічкы наіншталована ікона од майстра Крижановского, і каплічку втогды наново высвятив пряшівскый помічный єпіскоп – священомученик Василь Гопко. В році 2000 коло головной каплічкы было прибудоване місце про боголужіня в екстерьєрі, у 2008-ім році быв зреконштруованый цілый ареал.

Фото: Лукаш Колцун