І Конвент Війтів і Бургомайстрів Ґорлицкого Повіту

В Каштели в Шымбарку одбыл ся І Конвент Війтів і Бургомайстрів Ґорлицкого Повіту. Головныма темами першой такой стрічы были медже інчыма квестиі проблемового доізду до автострады А4 ци обводниця Ґорлиц.

На запрошыня старосты Мирослава Вальонґа на конвент пришли м.ін. Лукаш Смулка, маршалок малопольского воєвідства і самоурядовці ґорлицкого повіту.

Стріча была нагодом, жебы омовити актуальны справы, потребы і выкликы, з якыма наштоден міряют ся локальны самоуряды.

На подіі присутна была тіж посланкыня Барбара Бартусь, віцеведуча соймику малопольского воєвідства Ядвіґа Вуйтович і радный соймику малопольского воєвідства Томаш Платек.

Особливу увагу бесідникы посвятили квестиі поправы получыня Ґорлиц з автострадом А4 і модернізациі істнуючой дороговой інфраструктуры. Тепер доізд до автострады в страну Кракова заберат вельо часу. В плянах єст побудувати лучник ВД977, котрый скоротит переізд і поправит комфорт подорожы.

Єдном з основных тем была плянувана до будовы обводниця Ґорлиц. Підкрислено, што забезпечены сут середкы высокости 3,5 млн зл на рокы 2025-2027 на актуализацию концепциі вєдно з позысканьом Рішыня о середовисковых обставинах. Конкурс оферт передвидженый є на І/ІІ четвертину 2025 рока. То актуализация дотеперішнього проєкту і анализа новых можливости вариянтів трасы.

Омовлено тіж розвиток роверовой інфраструктуры, в тым трасу VeloRopa. Закінчено етап збераня материялів, што тыкают концепциі, наступным кроком буде здобыти одповідні схваліня і ґрунты під будову.

Дискусия обняла тіж розвиток желізниці і конечніст модернізациі штрек номер 110 і 103. Самоурядовці внескували о дальшы анализы і конкретны діяня в тій обшыри, жебы поправити транспортову доступніст в реґіоні і злегшыти подорожы.

На конвенті присутна была Катажына Венґжын-Мадея, директорка заряду воєвідскых доріг в Кракові, котра представила пляны дороговой інфраструктуры в поєдных ґмінах ґорлицкого повіту. Катажына Антош з маршалківского уряду малопольского воєвідства запрезентувала інформациі о актуальных наборах з Европейскых Фундушів.