Округлый юбілей владыкы Кіріла Василя

10-го апріля 2025-го року кошыцькый єпарха – архієпіскоп Кіріл Василь, святкує оркуглый юбілей – 60 років жывота. Преосвященый владыка Кіріл веде Кошыцьку ґрекокатолицьку єпархію од 2020-го року. Перед тым, понад 30 років жыв і діяв у Римі, де так само быв на высокых посадах.

Свою довіру му Папа римскый Франціск проявлює у важных темах доднесь, кедьже попри обовязках єпархіалного єпіскопа повірив го наприклад і задачами в далекій Індії.

Народив ся владыка Кіріл 10-го апріля 1965-го року в Кошыцях. Його отець быв ґрекокатолицькым священиком. Богословскы штудії закінчів на Римокатольцкій кіріломефтодійскій богословскій факулті Універзіты Коменьского в Братіславі у 1987-ім році. В тім часі ґрекокатолицькы богословы штудовали на римокатолицькій факулті, бо властну семінарію  і факулту ґрекокатолици не могли мати.

По закінчіню штудій быв крижевацькым єпархом Славоміром Мікловшом рукоположеный на священика Пряшівской ґрекокатолицькой єпархії. Єпархія втогды не мала свого єпіскопа, вів єй ордінарій Йоан Гірка, пізнішый єпарха.

В авґусті 1987-го року, з позволіньом ордінарія, еміґровав до Італії, і почав штудії на Правницькій факулті Папского восточного інштітуту в Римі. В децембрі 1989-го року здобыв ліценціат канонічного права, і зачав штудовати приправный рік ку докторату. В октобрі 1990-го року штудії перервав, і наступив до новіціату Товариства Ісусового (єзуіты) у Дженові.

По навернутю до Рима у 1992-ім році продовжовав у штудіях, і в децембрі 1994-го року здобыв докторат канонічного права на Правницькій факулті Папского восточного інштітуту в Римі. У 2002-ім році быв на тій школі выбратый за декана, проректора, і в маї 2007-го року быв выменованый за ректора.

Од мая 2009-го року быв секретарьом Конґреґації (днесь Дікастерія) про восточны церькви. Втогды быв і призначеный за архієпіскопа, єпіскопске рукоположіня прияв в юні од крижевацького єпіскопа Славоміра Мікловша, втогдышнього пряшівского архієпскопа і митрополіты Йоана Бабяка, і втогдышнього кошыцького єпархы Мілана Хаутура. Дістав тітул тітуларьного архієпіскопа Птолемаіды в Лібії.

20-го януара 2020-го року быв Вселеньскым Архієрейом Франціском призначеный за апостольского адміністратора sede plena Кошыцькой ґрекокатолицькой єпархії.

21-го юна 2021-го року быв Папом рисмскым Франціском призначеный за члена Верьховного трібуналу Апостольской сіґнатуры у Ватікані. О три дні пізніше, 24-го юна прияв Папа Франціск зречіня ся пастырьского ряджіня Кошыцькой ґрекокатолицькой єпархії передложене владыком Міланом Хаутуром, довтогдышнім єпархом, і єдночасно призначів за кошыцького єпарху владыку Кіріла.

31-го юла 2023-го року быв владыка Кіріл Папом Франціском призначеный папскым делеґатом із особливыма правами про католиків Сірійско-малабарьской церькви в Індії, окремо в Архієпархії Енакулам-Анґамалі.

7-го фебруара 2024-го Вселеньскый Архієрей призначів владыку Кіріла за члена Дікастерії про кавзы святых.

Владыка є рядным членом Рады єрархів Ґрекокатолицькой митрополітной церькви sui iuris – свого права, на Словакії. В Конференції єпіскопів Словакії, в котрій беруть участь і ґрекокатолицькы єпіскопи, веде Раду про інштітуты засвяченого жывота і общества апостольского жывота, а так само Раду про родину.

Владыка Кіріл є втором дакілько книг, многых іншых публікацій, рокы співпрацовав з Radio Vaticana. В посліднім часі реґуларно співпрацує з хріастіаньскым порталом Dokostola.sk, де му выходить рубріка Апокріфы архієпіскопа Василя.

Архієпіскоп Кіріл Василь быв головным святительом на єпіскопскій хіротонії Высокопреосвященого Йоны Максима, пряшівского архієпіскопа і митрополіты.

В Кошыцькій єпархії владыкови залежыть і на народностных меншынах. Іщі як апостольскый адміністратор у 2020-ім році призначів у єпархії вікарів про Мадярів, Русинів і Українців. На многая літа, владыко!