Для родичів – новый термін складаня внесків о занятя з лемківского языка

В Деннику Устав опубликували розпоряджыня Міністра Едукациі, котре змінят терміны складаня внесків о занятя для школярів нацийональных і етнічных меншын. Документ треба буде зложыти до кінця липця/юлия, а не як то было перше – до 20. вересня/септембра даного шкільного рока. То велика зміна.

Оголошеный документ то розпоряджыня Міністра Едукациі з 10. квітня/апріля, котре змінят розпоряджыня в справі обставин і способу выконуваня через предшколя, школы і публичны пляцівкы задач, котры уможнюют підтримувати почутя нацийональной, етнічной і языковой достоменности учеників, котры належат до меншын.

Для тых, котры продолжают науку

Згідні зо змістом розпоряджыня, внесок о занятя для школярів нацийональных і етнічных меншын треба зложыти директорови школы або предшколя не пізнійше як до 31. марця шкільного рока, што попереджат шкільный рік, котрого має тыкати орґанізация занять.

Для тых, котры зачынают науку

В примірі дітины, котра зачынат ходити до даного предшколя ци школы, максимальный термін, котрого треба дотримувати, жебы директор зорґанізувал занятя з меншынового языка і з наукы свойой істориі і культуры, то 31. липця/юлия шкільного рока, што попереджат шкільный рік, в котрым дзецко зачне вчыня. Перше такій внесок мож было зложыти іщы в часі тырваня нового шкільного рока, значыт до 20. вересня/септембра.

Для тых, котры хотят зрезиґнувати

Розпоряджыня реґулює тіж терміны резиґнациі з занять наукы меншыны, наукы реґіонального языка і наукы свойой істориі і культуры. В такым примірі родиче або полнолітній ученик можут зложыти одповіднє освідчыня директорови школы не пінійше як до 31. марця шкільного рока, што попереджат шкільный рік, котрого має тыкати резиґнация.

В документі зазначено, што новы переписы обовязуют уж в 2025 році і освідчыня треба зложыти не пізнійше як до 31. липця/юлия 2025 рока. Зміны мают усправнити рыхтуваня орґанізациі шкільного рока.

Розпоряджына входит в жытя 30. квітня/апріля.