У Виноградові і Поляні припомянули собі при памятниках річніцю Духновіча

24-го апріля 2025-го року припоминали сьме собі 222 років од народжіня русиньского будителя Александра Духновіча. З той нагоды в тот день на Підкарпатю, у Виноградові і Поляні, зышли ся представителі русиньскых орґанізацій при памятниках Духновіча, жебы оддати честь найвызначнішій особности русиньского народа.

В Поляні на памятній події зышли ся членове Свалявского общества підкарпатьскых Русинів вєдно із головов Михаілом Сарканичом, членове Русиньского културолоґічного клубу, котрого головов є Юрій Шиповіч, як і далшы русиньскы актівісты.

У Виноградові люди зышли ся коло нового памятника, котрый быв зробленый тот рік із фінанчнов підпоров Виноградівской містьской рады. Попередній памятник, котрый быв із ґіпсу, быв важні пошкодженый.

„Першый памятник Александра Духновіча у Виноградові дав зробити священик і першый голова Общества імени Александра Духновіча – Євменій Сабов, напроти ґімназії. Але з приходом совітьской влады памятник заникнув. То было іщі 100 років тому. У 2005-ім році коло містьской общеосвітньой школы ч. 1, теперь ґімназії, одкрыло памятник общество Просвіта,“ повів у приговорі голова Закарпатьского областного научно-културолоґічного общества імени Александра Духновіча – Юрій Продан.

Но тот памятник, як уж было спомянуто, быв з ґіпсу. Тот рік вдяка фінанціям з містьской рады зробив із бетону новый памятник Іван Гецько. Художник, іконописець і скулптор Гецько повів, же переважно перед тым робив скулптуры з дерева. Ґіпсовый памятник быв за його словами так пошкодженый, же не было што рештавровати. Зато взяв ся за роботу над новым памятником.

Ку памятнику Духновіча у Виноградові поставили кошыкы з квітками передставителі Закарпатьского областного научно-културолоґічного общества імени Александра Духновіча і Виноградівской містьской рады.

Як інформовав Юрій Шиповіч, на Підкарпатю є шість памятників Духновіча – в Ужгороді, Мукачові, Поляні, Колочаві, Хусті і Виноградові.

Фото: Микола Поцко і regnews.com.ua.