В Римі проходить Юбілей восточных католицькых церьквей

В Римі од 12-го до 14-го мая 2025-го рoку проходить тридньовый Юбілей восточных католицькых церьквей. То тринадцята із головных етап Юбілейного року 2025, котра до Вічного міста притягла приблизно пять тісяч путників і представителів різных восточных церьквей – патріархів, митрополітів, єпіскопів із цілого світа.

Як інформовав портал Vatican News, „участны пришли з такыx розмаїтых держав як Італія, Споєны штаты Америкы, Україна, Іспанія, Ріопія, Франція, Бразілія, Арґентіна, Мексіко, Канада, Пакістан, Колумбія ці Банґладеш, жебы вєдно одсвятковали свою ідентіту і єдность із наслідником Петра“.

На Юбілею восточных католицькых церьквей суть і представителі русиньской традіції, єпіскопи із Словакії, Мадярьска, Хорватії, Мукачовска єпархія має якраз в тім часі свою офіціалну путь в Римі в рамках Юбілейного року, на котрій беруть участь віруючі і духовны вєдно із своїм правлячім єпіскопом – Преосвященым Теодором Мацапулом.

„Вшыткых восточных католиків у Вічнім місті привітав кардінал Клаудіо Ґуджеротті, префект Дікастерії про восточны церькви. Передовшыткым підкреслив, же Рим вітать вшыткых восточных хрістіанів і хоче, жебы в нім чули ся як дома. Акцентовав нелем стародавность і красоту окремых восточных католицькых обрядів, але передовшыткым припомянув їх вірность Ісусовому апелу по єдности, і свідоцтво о Хрістови, за котре днесь многы восточны католици платять переслідованьом і мучеництвом,“ інформовав Пресовый центер Кошыцькой єпархії.

Святкованя почали в понедільок 12-го мая рано служіньом Божеской літурґії в етіопскім обряді в Каплиці хору Базилікы святого Петра, котру приготовили Етіопска і Ерітрейска церьков. В тот самый день наслідовала армяньска літурґія в Пауліньскій каплиці в Папскій базиліці Santa Maria Maggiore, а пополідне літурґія в коптьскім обряді, котра была одслужена на тім самім місці.

У віторок 13-го мая продовжує проґрам служіньом Божеской літурґії в сірійско-восточнім обряді, з Анафоров Аддая і Марі, яку Католицька церьков признала лем у 2001-ім році, в Базиліці святого Петра. Тоту літурґію приготовили Халдейска і Сірійско-малабарьска церьков. Вечур одслужыть ся вечурня в сірійско-западнім обряді в Базиліці Santa Maria Maggiore, котру будуть служыти Маронітьска, Сірійско-католицька і Сірійско-маланкарьска церьков.

Літурґічный день закінчіть ся акафістом перед базиліков, котрый приготовили штуденты візантійскых колеґій в Римі.

Головным пунктом юбілея буде авдієнція у Святішого Отця Лева XIV., яка одбуде ся в середу 14-го мая дополідне в Авлі Павла VI. Наслідно в пополідняйшых годинах в Базиліці святого Петра буде одслужена Божеска літурґія у візантійскім обряді, котру будуть вєдно служыти церькви свого права, якы хоснують візантійскый обряд.

Із Словакії беруть участь на Юбілею восточных католицькых церьквей Высокопреосвященый Йона Максим – пряшівскый архієпіскоп і митрополіта, Преосвященый Петро Руснак – братіславскый єпарха, і помічный єпіскоп Братіславской єпархії – кір Мілан Лах.