Шпіоны і домашня задача

Мадярьско зрушыло плановану білатералну стрічу з Українов о правах народностных меншын. Причінов є, подля офіціалного выголошіня державного секретаря мадярьского резорту діпломації, ескалація напруг по обвиніню з мадярьской шпіонажи на теріторії Україны.

Мадярьско подля выголошіня зістало одкрыте діалоґу, но натеперь не мож зреалізовати таку стрічу „в одношіню з чутливостьов сітуації“.

О чім є ціла шпіонажна кавза меджі Мадярьском і Українов? СБУ інформовала о тім, же затримала двох мадярьскых офіцірів тайной службы, котрых підозрівать із того, же зберали інформації в Закарпатьскій области Україны, включно даных о сістемах противоздушной обороны.

На інцідент реаґовав шеф мадярьской діпломації Петер Сійярто, котрый інформовав о выгощіню двох робітників україньской амбасады в Будапешті. Но а пак Мате Кочіш, шеф парламентной фракції владной партії Fidesz по іменах назвав три особы, котры Мадярьско выгостило з причіны підозрінь, же робили шпіонаж.

Без огляду на то, ці іде о тверды факты на єднім і другім боці, або холем на єднім із тых боків, припадно ці іде о далшу діпломатічну войну на трасі Київ – Будапешт, стопроцентно можеме знати то, же кажда країна має свої інтересы, і має тайны службы, котры на тых інтересах роблять.

Не є жаднов таємніцьов ани то, же Віктор Орбан і його партія Fidesz не є великым прихыльником того, жебы Україна была якось звыгодньована в процесі вступу до Европской унії, припадно, жебы процес мала перебігнути скоро як Усаін Болт куртый шпрінт. А каждый терезвый чоловік мусить видіти, же справды Україна, і кебы днесь скінчіла война, не має кондіцію Болта, жебы могла зробити світовый рекорд в шпрінті у приступовім процесі.

Самособов, кавзу, котра почала выголошіньом СБУ, днесь Орбан хоснує і в домашній політіці. Не дішло лем до того, же Мадярьско зрушыло плановану стрічу. Орбан обвинив Київ, же ся намагать в Мадярьску саботовати владов спущену конзултацію, яка дотулять ся можливого вступу Україны до Европской унії. Жебы не было мало, обвинив опозічну партію TІSZA, же служыть в тім ділі Українцям.

Не думайме собі, же покля бы TISZA дістала ся до властей, на проблемы Мадярів на Підкарпатю бы ся выкашлала.

Без емоцій і гіпотетічных теорій повіджме собі факты. Тым першым є, же такзваны народны конзултації, котры Орбан запровадив як даякы необовязуючі референдумы, якраз із свойой дефініції суть необовязуючі, а кебы дішло ку зміні властей в Мадярьску, і владнов партійов бы стала наприклад споминана TISZA, резултаты той народной конзултації може шмарити до коша.

По друге, наперек тому, же днесь найміцніша опозічна партія, котру веде бывшый політічный кумпан Орбана – Петер Мадяр, є проураїньска і підртимує тот такый брусельскый скорый процес приятя Україны до Унії, не думайме собі, же покля бы TISZA дістала ся до властей, на проблемы Мадярів, якы жыють на Підкарпатю, бы ся выкашлала.

Самособов, Віктор Орбан є днесь поважованый за того єдиного, хто ся „мішать“ до справ іншых держав і воює за інтересы Мадярів у тых державах. Але то не є правда.

Словакія має так само скушеность, же были і іншы влады в Будапешті, не лем Орбанова, а на права „своїх“ на Словакії тискали. Словакія мусила так само приспособити свою меншынову політіку так, жебы з Мадярьском не быв спор, і жебы могла вступити до Унії.

Но і теперь тото найосновніше. Забудьме на шпіоньскы історії, на діпломатічны войны, котры меджі Будапештом і Києвом не суть першы, а бізовно ани послідні. Вернийме ся на початок. Мадярьско зрушыло білатералну стрічу, котра мала дотуляти ся прав народностных меншын.

Фактом є, же кебы собі Україна повнила свою домашню задачу, кебы не мінила меншынову леґіслалтіву лем так, на око, але справды хотіла запровадити европскы штандарды про меншыны, пак бы жадну стрічу не было треба. Днесь бы ся жадна зрушена стріча не рішыла. Лемже она собі тоту домашню задачу не повнить, а Мадярьско, і кебы там сидів хоцьхто іншый намісто Орбана, є в праві, кедь ся выгорожує блокованьом.

О тім, же собі жадны меншыновы штандарды не повнить односно Русинів, ани не мусиме діскутовати. Значіть, забудьме на шпіонів, а намісто крітікы Мадярьска в тій справі, радше вєдно з ним позорно слідуйме, як собі Київ (не) робить домашню задачу з благословліньом Брусела.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.