Сумар дня на 23. мая 2025 р.

Приносиме вам сумар медияльной ґрупы ЛЕМ.фм+ на ден 23. мая 2025 р.

Нoвый дзвін в русиньскій церкви в гуменьскым скансені

В Церкви святого Михаіла Архістратига, котра є частю експозициі народной архітектуры і бываня – скансену, Выгорлятского Музею в Гуменным, прибыл новый дзвін. Посвяченый был при нагоді Медженародного Дня Музеів, в неділю 18. мая. Дзвін был одляный в минулым році при нагоді 260. річниці выбудуваня того храму, якій походит з русиньского села Новоселиця. В церкви бракувало дзвона, одколи в 70 роках ХХ столітя была перенесена до гуменьского скансену. Дзвоны, котры ориґінально находили ся в побудуваным в 1764 р. храмі, остали в селах Новоселиця і Збой. Зато до памятковой церкви одляный был новый, з оглядом на характер інчых дзвонів в тым реґіоні. Детальнійшы інформациі прочытате в дописі на нашым портали.

Ґміна Санкова зберат опініі про нову форму опікы над малыма дітми

Як поінформувала ґміна Санкова, думают одкрыти нову форму опікы над молодыма жытелями – дітми до 3. років. Закля єднак будут підняты конкретны діяня, хотят познати потребы і жаданя родичів і опікунів. Зато просят выполнити коротку анкєту, яка провірят запотрібуваня на опіку над дітми до 3. років. Має она помочы окрислити, ци єст реальне заінтересуваня одкрытьом ясел або затрудніньом денного опікуна, якы годины опікы были бы найбарже одповідні, кілько років мают діти, якы могли бы корыстати з такой формы спертя та ци запевніня інституцийональной опікы уможливило бы піднятя працы або дальше вчыня. Зобраны одповіди будут схоснуваны до опрацуваня пляну діяня. Мотузок до анкєты мож найти на інтернетовым сайті ґміны Санкова.

Днес початок головного проґраму Русиьского Фестівалю в Свиднику

Днес в Свиднику зачынат ся головна част 13. Фестівалю Культуры Русиинів Словациі – Русиньского Фестівалю, котрого головным орґанізатором є Окресна Орґанізация Русиньской Оброды в Свиднику. Проґрам фестівалю был заплянуваный на цілый тыжден – до четверга проходили ріжного рода товаришучы акциі. Днес о 17.00 год. зачынат ся головна част фестівалю – в свидницкым амфітеатрі, і потырват до неділі. В тым часі пройде тіж 6. річник Фестівалю Орфеус – музичной переглядкы авторской русиньской творчости. Окрем ПУЛЬС-у, выступлят тіж м.ін. словацкы популярны вокалисты, такы як Алян Мурін ци Адам Дюріца. Субота і неділя буде належала головно домашнім колективам і гостям, і буде переважно в фольклорным духу. Полный проґрам і можливіст придбаня білету на сайті Русиньского Фестівалю.

ІІІ Лемківскє Співаня на Высокым

А уж заран, в суботу 24. мая на Высокым в ґміні Рудна одбуде 3. Лемківскє Співаня. На подію просит Ґмінный Центр Культуры Ґміны Рудна. Стріча зачне ся о 13.00 год., а першом атракцийом буде перехід в хороводі ансамблів. На сцені запрезентуют ся ЛАПіТ «Кычера», Ластівочка, Розтока, Поляне, Сасанка, Н’Лем Фольк, Дамир, Надія і Лемкус. Орґанізаторы задбали і о додатковы атракциі, выставы, буде презентация народной творчости і варштаты. Не бракне забав для наймолодшых. Патронами подіі сут KGHM to my і ініциятива Gmina Rudna łączy ludzi.