Сумар дня на 6. червця/юнія 2025 р.

Приносиме вам сумар медияльной ґрупы ЛЕМ.фм+ на ден 6. червця/юнія 2025 р.

Ославы Дня Русинів в Пряшові

В найблизшу неділю 8. червця/юнія в Пряшові пройдут цілонародны ославы Дня Русинів на Словациі, якы рыхтуют Русиньска Оброда на Словациі з партнерами. Торжество зачне ся о 14.00 год. пєтным актом при памятнику Александра Духновича. Пак містом Пряшів піде коровід в народных кроях. О 15.00 год. в Театрі Йонаша Заборского в Пряшові одбуде ся вернісаж выставы творів з назвом «Русины на образах». Головный пункт проґраму – Ґаляпроґрам Дня Русинів – зачне ся о 16.00 годині на Великій Сцені Театру Йонаша Заборского. В святочным концерті запрезентуют ся фольклорны колективы і солисты: Дубрава з Пряшова, Вінок з Шаришского Астряба, Кычара зо Снины, Радость з Камюнкы, Наталия і Мікуляш Петрашовскы з Гуменного, Лабірскы Бетяре з Меджелабірців, Йожко Копча зо Свидника і рецитаторка Мария Хомова з Решова. Білеты мож придбати на інтернетовым сайті Театру Йонаша Заборского в Пряшові. Подія є ославом русиньской культуры, традициі і достоменности.

Творы Енді Варголя мали дебют на польскым авкцийным рынку

Образы Енді Варголя были ліцитуваны в Варшаві. То дебют творів мастера поп-арту на польскым авкцийным рынку. Авкция одбыла ся в минулый віторок 3. червця/юнія в Авкцийным Домі Польсвісс Арт і перешла до істориі польской штукы. До вылицитуваня были дві працы Варголя. Перша з них то портрет Кейті Йонс, выконаный в 1973 р. лученом техніком акрилю і сітодруку на полотні. Образ был выліцитуваный за 5 млн 600 тис. злотых. Другій з выліцитуваных образів носит назву «То Ґрета Ґарбо» і походит з циклю «Шалены Золоты Черевічкы» («Crazy Golden Slippers»). Артиста спортретувал в ним вызначны особности попкультуры як черевікы. Окрем Ґреты Ґарбо спортретувал в рамках циклю Ельвіса Преслея, Джеймса Діна ци Жа Жа Ґабор. Образ был выконаный мішаном техніком акварелі і тинты, збогаченый золотыма аплікациями. Был проданый за 850 тис. злотых.

KGHM Польска Мід хоче выбудувати три новы шыбы

В минулым тыжни спілка KGHM Польска Мід інформувала о новых стратеґічных проєктах, котры можут быти зреализуваны в звязку з заповіданом властями зміном в мідьовым податку. То предовшыткым будова трьох шыбів, котры сут необхідны для удоступніня покладів міди: GG-2, Ретків і Ґавожыці. Інвестициі мают быти хосенны не лем для розвитку спілкы, але і вытворити новы місця працы і зміцнити господарку реґіону.

Лемківска Весняна Забава в ЗША

Заран в америцкым штаті Ню Джерзі одбуде ся Лемківска Весняна Забава. Подію рыхтує орґанізация Young Lemkos Of America – Молоды Лемкы Америкы. Орґанізацию творит ґрупа студентів і молодых професийоналистів, котрых головном цілю єст плеканя лемківской дідовизны. На забаві заграт ансамбль Vox Ethnica. То уж четверта едиция той подіі.

Конкурс на оповіст в меншыновым языку – выдолженый термін складаня прац

Як поінформувал Інститут Языковой Ріжнорідности, выдолженый был термін складаня зголошымь до конкурсу «Оповіст. Сила ріжнорідности». На зголошыня ждут до 15. червця/юнія тр. Конкурс єст направленый на вшыткых тых, котры любят оповідати, м.ін. в діалекті, языку нацийональной меншыны, етнійной меншыны, реґіональным ци міґовым, і хотіли бы спрібувати сил перед шыршом публиком. Реґулямін і формуляр зголошыня находит ся на інтернетовым сайті Інституту.