Сумар дня на 12. червця/юнія 2025 р.

Приносиме вам сумар медияльной ґрупы ЛЕМ.фм+ на ден 12. червця/юнія 2025 р.

В передден Світового Конґресу Русинів

Уж днес до столиці Румуніі сходят ся делеґаты на 18. Світовый Конґрес Русинів, якій буде проходил в пятницю і суботу. Дводньовый проґрам має цілоденны засіданя в румуньскым парляменті. Присутных буде приблизно 100 делеґатів і гостів. Лемковину будут репрезентувати члены Стоваришыня Лемків і Стоваришыня «Руска Бурса» в Ґорлицях. По святочным одкрытю будут вручены нагороды в обшыри культуры ім. Василя Турока-Гетеша і за умелецку творчіст ім. Івана Манайла, як тіж почестны грамоты Рады Світового Конґресу для юбілятів русиньского руху. Першого дня члены Світовой Рады Русинів будут справоздавати діяльніст Світового Конґресу Русинів за послідні два рокы, так само як кажда членьска орґанізация зреферує, што діяло ся в каждій з держав, в котрых активны сут поєдны стоваришыня. Справоздавати будут ся і председы поєдных конґресовых Комісий. Другій ден то головні выборы на новый період – конґресовых Комісий, єй председів та членів і председы самой Світовой Рады Русинів. В пляні єст приняти і Выголошыня делеґатів 18. Світового Конґресу Русинів про признаня прав Підкарпатскым Русинам на свобідне хоснуваня русиньского языка та іх достоменности. Конґрес закінчыт ся выбором місця чергового Конґресу. Дотля членом СРР за Польщу є Андрий Трохановскій, якій попередньо заступил Андрия Копчу.

Ден Святой Тройці (Русаля) в Любіні

Любіньска православна парохія св. Тройці святкувала свій праздник. В понедільок, 9. червця/юнія до Любіна пришол владыка Юрий, архієпископ вроцлавско-щеціньской єпархіі. Витали го на сам перед діти, староста парохіі Василь Дзядик, а пак місцевый парох – о. Богдан Репела. Присутны были священникы з другых сусідніх парохій, якы вєдно з владыком служыли архієрейску літургію. Архієпископ вроцлавско-щеціньской єпархіі звернул ся до вірных зо словом проповіди. Пак был крестный хід. На конец владыка дякувал парохови, імости та любіньскым копальникам за іх труд добра Церкви. Дякувал тіж церковному хорови. Вірны згромадили ся і на церковным пляци в рамках спільного святкуваня Святой Тройці – по народному – Русаля.

Похорон Війта Ґміны Любін

Вчера, 11. червця/юнія в Любіні одбыл ся похорон війта ґміны Любін – бл. п. Тадеуша Кєляна. Покійного пращали чысленно прибыли політикы, самоурядовці, представникы ріжных інституций і костельны власти. Участ в похороні взяла делеґация Стоваришыня Лемків. Тадеуша Кєлян был все приязно наставленый до лемківскых ініциятив. Як перед парома днями інформувало Стоваришыня Лемків, війт был камаратом орґанізациі, пристутным на Лемківскых Ватрах на Чужыні. До дня похорону обовязувала ґмінна жалоба. Покійный спочал на цмонтери в любіньскій Оборі.

Митрополита Йона Максим серед сербскых Русинів

Высокопреосвященный Йона Максим, пряшівскій грекокатолицкій архієпископ і митрополита, є од вітірка 10. до днес – четверга 12. червця/ юнія на обшыри єпархіі св. Миколая в Рускым Керестурі. В рамках свого офіцияльного поломництва до єпархіі, в віторок брал участ в одпусті в вызначным для тамтышніх Русинів поломницкым центрі, котре называт ся Водиця, і є недалеко Руского Керестура. Як інформовала аґентура Рутенпрес, на одпуст пришло великє чысло вірных, і был то уж 172. Завітный Ден. Так само собі в тым році припоминают 165. річніцю од посвячыня церкви на тым місци. Митрополита служыл літургію разом з рускокерестурксым єпархом – Преосвященным владыком Ґеорґійом Джуджаром. Тото свято збогатил спів церковного хору Храму Успенія Пресвятой Богородиці з Коцура. Праздник закінчыли процесийом і обходом коло храму.