Молитва прозвучала медже Святковом а Розстайным

Традицийно уж на граници Святковы Великой і Розстайного одслужена была Божеска Літургія при капличці, яка є локальным памятником Собору Мучеників Холмскых і Підляшскых, а окремо і священномученика Павла (Швайко) та мучениці імости Йоанны, якы перед тым, як пішли на Холмщыну, несли свою послугу серед православных вірных на Лемковині.

Богослужыня зачали ся з малого освячыня воды, якє завершыл в капличці о митр. Юлиян Феленчак з Морохова. Капличка, о якій бесіда, належыт до православной Церкви і є памятком архітектуры. То попри ній, перед парома десятлітями, громадили ся вірны на богослужынях, якы справлял о. Павел Шайко в меджевоєнным періоді для православных Лемків.

Суботню літургію очелювал архієпископ перемышльско-ґорлицкій Паісий, при участи духовенства ґорлицкого, креницкого і саноцкого деканатів. Співал хор під дириґентуром Мариянны Ярой.

Вірны зберают ся при капличці на святочну молитву все в другу суботу червця/юнія. Того рока, по чытаню Євангелиі з проповідю звернул ся креницкій парох, о. Петро Пупчык.

Владыка в слові до вірных підкрислил значыня мучеництва за віру, припоминаючы при тым тогорічный ювілей 1700-літя од І Вселеньского Собору з Нікеі, якій є спільном подійом для вшыткых християн.

Пастырскє слово вдячности было высловлене духовенству саноцкого деканату, якє каждого рока рыхтує святочне служыня при капличці медже Святковом а Розстайным, а так само дирекциі Маґурского Нацийонального Парку та місцевому лісництву за опіку над тым важным для православных Лемків місцьом.

Toгорічны святкуваня были трансміруваны через TVP Kultura в минулу неділю, 15. червця/юнія. Годинне награня мож видіти за тым мотузком.

фот. о. Ярослав Ґрич | orthodox.pl