Храмове свято в лемківскій парохіі в Заменицях

Грекокатолицка парохія св. Йоана Крестителя в Заменицях то єдна з тых громад, яку творят днес в більшости потомны выселеных з Лемковины. Як раз в віторок, 24. червця/юнія заменицка парохія празднувала своє престольне свято – Різдвo Святого Йоана Крестителя.

Празднуваня были подля нового календаря, якій грекокатолицка Церков в Польщы приняла в 2023 р.

В тот ден богослужыня очелил владыка Володимир – єпарха вроцлавско-кошаліньскій УГКЦ в Польщы. Спілслужыли му любіньскій парох, о. митр. Богдан Огородник, декан вроцлавскій о. Андрий Михалишын – парох вроцлавской катедры, о. Богдан Ільницкій – священник з Єленьой Горы, Любаня, Зґожельця і Ґерліц, та місцевый парох – о. Павел Березка.

Проповід в тот ден тримал владыка Володимир. В слові до вірных припомнул подію народжыня Йоана Крестителя – пророка і предтечы Господнього. Підкрислил, што Господ не выбрал молодых, але старенькых Захария і Єлисавету, котры долго не мали діти і были в очах люди уж без надіі. Тото як раз вказує, што старшы люде не сут тягаром, але богатством – вартуют опікы, пошаны і любови зо стороны молодшых ґенераций.

Окрем домашніх вірных, до спільной молитвы долучилы приіздны гості з сусідніх парохій – Любінa, Ліґници і Патокы. Співал місцевый парохіяльный хор.

По закінчіню Божеской Літургіі парох о. Павел Березка подякував вшыткым присутным за спільну молитву в праздничный ден. Завершыньом службы было Многолітствіє.

Заменицка парохія то єдна з тых, якы творят Лемкы – вірны грекокатолицкой церкви. Іщы до 2023 р. грекокатоликы в Польщы святкували подля юлияньского рахуваня. Рішыньом церковных власти од 1. вересня/септембра 2023 р. грекокатоликы в Польщы (слідом за церквю на Украіні) перешли на тзв. новый календарный стиль для нерухомых свят, з єдночасным залишыньом чынной Пасхалиі. В практиці означало то перехід на тзв. новоюлияньскій календар.

Парохія в Заменицях была єдном з тых, якой вірны частично противили ся зміні календаря, хотячы празднувати м.ін. Роджество Христове подля юлияньского рахуваня. Прото тіж дотеперішні подіі – «Лемківскій Кєрмеш» были все орґанізуваны при нагоді сватя Йоана Крестителя, якє выходит за юлияньскым календарьом 7. липця/юлия.

То тіж єдна з нечысленных грекокатолицкы парохій в Польщы, де поєдны части богослужынь сут іщы по церковнославяньскы, а не выключно по украіньскы. Вчас літургій в заменицкій парохіі апостольскы чытаня мож было чути по лемківскы – з хоснуваного Апостола од грекокатоликів на Словациі.

20. червця/юнія 2022 р. в 75. річницю акциі «Вісла» при церкви одкрыто пропамятну таблицю, яка посвячена єст лемківскым жертвам выселіня.