Беатіфікація Петра Павла Ороса одбуде ся в септембрі

Як інформовала у віторок 1-го юла 2025-го року на своїм офіціалнім сайті Мукачовска ґрекокатолицька єпархія, Дікастерія у справах вызнаня святых офіціално встановила дату, коли одбуде ся беатіфікація священомученика Петра Павла Ороса.

Беатіфікація одбуде ся в селі Білкы на Підкарпатю в суботу 27-го септембра 2025-го року. Писмо, в котрім Дікастерія інформовала о новій даті, было адресоване мукачовскому єпархови – Преосвященому Теодорови Мацапулови.

Торжественну Божественну літурґію із обрядом беатіфікації очолить Його Еміненція Кардінал Ґжеґож Рись, лодзьскый архієпіскоп, котрый є призначеный Папскым леґатом про тоту подію. Він так само выголосить декрет од Святішого Отця о зарахованю отця Петра Павла Ороса до лику блаженых Католицькой церькви.

Припоминаме, же беатіфікація мала одбыти ся 3-го мая того року. Лем пару днів перед тов датов, 24-го апріля, было Мукачовсков єпархійов оголошене, же беатіфікація ся мусить перенести.

„Почас остатніх днів, од смерти Папы аж до вечора середы, мы вели постоянный і завзятый діалоґ із Апостольсков нунціатуров на Україні, котрій подарило ся сконтактовати із одповідныма особами з Колеґії кардіналів,“ інформовала втогды єпархія.

„Почас тых конзултацій дізнали сьме ся, же деякы з потрібных документів, котры мав підписати Святішый Отець Франціск про завершальне проведжіня беатіфікації, не встиг підписати почас жывота. В повязаню з тым проведжіня торжества беатіфікації на даній етапі стало неможливым,“ чітали сьме в апрілю в офіціалнім выголошіню Мукачовской єпархії.

Як сьме вже інформовали скоріше, буде то першый раз в історії Підкарпатя, же буде чоловік із той землі выголошеный за блаженого якраз на домашній землі.

Папа Римскый Франціск іщі 5-го авґуста 2022-го року прияв на авдієнції Кардінала Марчелла Семераро, префекта Дікастерії у справах вызнаня святых, почас котрой потвердив декреты, якы дотуляють ся беатіфікаційных процесів. Першым в тім списку быв декрет вызнаня мучеництва Слугы Божого отця Петра Павла Ороса, русиньского священика Мукачовской ґрекокатолицькой єпархії, тайного єпіскопа.

Єпархія інформовала, же проґрамы беатіфікачных торжеств будуть публікованы в найблизшім часі.