В Полонинах прибыли далшы кілометры біціґльовых стежок

В Полонинах 1-го юла 2025-го року передали до хоснованя біціґлістам далшы кілометры біціґльовых стежок. Пряшівскый самосправный край (ПСК) выбудовав в рамках ціклоокругу Poloniny trail 11,5 км новых ціклостежок.

Стежкы прибыли в селах Стащін і Влыч. Самосправа в них вдяка властным і европскым грошам проінвестовала 6,7 міліона евр. Інформовала о тім Леа Леготьска із Одділіня комунікації ПСК.

В Стащіні прибыло цілково вісем кілометрів біціґльовых стежок із трьома лавками, єдным мостом і двома алтанками. Тоты мають і електричне ладованя, стоян на біціґлі, лавочкы, стіл, огниско.

До рока і пів хоче ПСК добудовати іщі 2,32 км довгу часть в Снині, і то так, жебы біціґлісты без перервы дістали ся по біціґльовій стежці із Снины аж на Руське сідло. Новозбудована часть в Стащіні прямо надвязує на ціклотрасу Старина – бывше село Руське в довжці 14,3 км, котру край передав до хоснованя рік тому.

„Моїм сном є, жебы сьме скапчали цілы Полонины з окресным містом Снина. Жебы люди ту могли комфортно прийти по ціклотрасі, а не мусили ходити помеджі авта. Інтересно і розумно бы сьме правдоподобно знали вырішыти і споїня меджі Земпліньскыма Гамрами а Стащіном. Тота теріторія народного парку має величезный потенціал, але потребує мати добрі выбудовану інфраштруктуру, о што будеме і далше намагати ся. Актуално до нас ходить вельо Поляків і Чехів, но нашым цільом є звидительнити Полонины про цілу Словакію,“ повів председа ПСК Мілан Маєрьскый.

З новой біціґльовой стежкы можуть тішыти ся і в селі Влыч, де прибылио 3,5 кіломатра. В рамках ціклотрасы Влыч – Кривый найдете і 24 метрів довгу ціклолавку ці алтанок. Проінвестованых было 1,6 міліона евр. Ку новій трасі Влыч – Кривый хоче іщі крайска самосправа добудовати 1,7 км довгу часть. Так само актівно приготовлює і ІІІ. етапу добудованя части Влыч – Березовець – Кална Розтока в довжці 16,47 км.

„Інтензівно робиме і на далшых частях ціклотрасы Poloniny trail. Лем в найблизшых трьох роках будеме намагати ся збудовати в тім реґіоні коло 20 аж 25 кілометрів ціклотрас,“ уточнив директор Справованя і утримованя драг Марцел Горват.

Poloniny trail – то унікатный проєкт реалізованый в рамках ініціатівы Catching-up Regions у співпраці з Европсков комісійов і Світовов банков, котрый заміряный є на выбудованя ціклоокругу в довжці 74 км. Із перепоїньом на Польщу і Україну бы мав мати довєдна аж 98 км. На словацькім боці граніці має іти катастрами сел Стащін, Рунина, Руськый Потік, Кривый, Влыч, Березовець, Руська Волова, Кална Розтока і Стащіньска Розтока.