Сумар дня на 4. липця/юлия 2025 р.

Приносиме вам сумар медияльной ґрупы ЛЕМ.фм+ на ден 4. липця/юлия 2025 р.

Запрошыня на подіі присвячены памяти бл. п. Богдана Ґамбаля

Заран, в суботу 5. липця/юлия на Лемковині будеме припоминати бл. п. Богдана Ґамбаля, выдатного лемківского діяча, єдного з основателів одновленой ґорлицкой Руской Бурсы і думкодавцю першого лемківского радия ЛЕМ.фм, од котрого смерти выполнило ся 2. липця/юлия 5 років. Хочеме запросити вас на дві стрічы, якы будут присвячены його памяти. Одбудут ся они уж заран, в суботу 5. липця/юлия. О год. 11:30 на Святій Горі Явір буде правлене в місцевій каплици богослужыня. Пак, о год. 14:30 просиме вшыткых на споминову стрічу до Руской Бурсы в Ґорлицях, де будеме споминати спільны моменты з Покійным Богданом Ґамбальом. Хочеме вернути ся до його думок, діяня і присутности – не лем як до споминів, але як точкы однесіня для того, што є днес.

Припадкы дискримінациі меншын в Малопольщы мож зголосити на специяльный майльовый адрес

Як поінформувал полномічный малопольского воєводы до справ нацийональных і етнічных меншын, в навязаню до догварінь зо стрічы з орґанізациями нацийональных і етнічных меншын в Малопольщы, котра одбыла ся 6. червця/юнія тр. в Малопольскым Воєвідскым Уряді в Кракові, та беручы до увагы безпеку і пошануваня прав осіб належачых до нацийональных і етнічных меншын, в Малопольскым Воєвідскым Уряді был одкрытый специяльный майльовый адрес: mnie@malopolska.uw.gov.pl. На реченый адрес мож зголошувати припадкы языка ненависти, дискримінациі ци інчы проявы словной або символичной аґресиі, з якыма стрічают ся члены нацийональных і етнічных меншын. Цілю одкрытя скринкы єст збераня інформаций необхідных до моніторуваня явиска языка ненависти на рівни воєвідства, уможливіня скоршого реаґуваня на непокоячы соспільны сиґналы, будуваня діалоґу і зміцняня довіря медже публичном адміністрацийом і меншыновыма соспільствами.

Спільне рыхтуваня Святой Горы Явір до свята

Братство Православной Молодежы Перемышльско-Ґорлицкой Єпархіі просит на спільне рыхтуваня Святой Горы Явір до свята. Шторічный праздник святых апостолів Петра і Павла одбуде ся на Святій Горі Явір уж о тыжден, в суботу 12. липця/юлия. В тым році свято буде выняткове, зато же звязане з 100. річницьом Обявліня ся Лемкам Богородиці. Братство просит вшыткых, котры можут помочы, в найблизшый віторок 8. липця/юлия од 9.00 годины.

Конкурс оферт на реализацию социйолоґічного досліджыня

Стоваришыня ”Руска Бурса” в Ґорлицях просит складати оферты на реализацию социйолоґічного досліджыня о кількістным характері, веденого методом CAPI або PAPI. Выконавця буде мал за задачу м.ін. зреализувати 800 анкєтовых бесід на обшыри ґорлицкого повіту, ґміны Санкова і ґміны Устя Рускє. Оферты мож присылати до 17. липця/юлия тр. Дрібниці што до вымагань і обсягу задач, як і контактовы даны найдете на портали lem.fm.

Новы біциґльовы стежкы в Полонинах

В Полонинах 1. липця/юлия тр. передали до хоснуваня дальшы кілометры біциґльовых стежок. Пряшівскій Самосправный Край выбудувал в рамках цикльоокругу Poloniny trail 11,5 км новых стежок. Стежкы прибыли в селах Стащын і Влич. До пілтора рока ПСК хоче добудуваи іщы част в Снині, так жебы біциґлисты без перервы достали ся по роверовій стежці зо Снины аж на Рускє сідло. Крайска самосправа хоче добудувати дальшу част і ґу новій трасі Влич – Кривый. Так само активно рыхтує ІІІ етап добудуваня части Влич – Березовец – Кальна Розтока. Веце на тоту тему чытайте в дописі на нашым портали.