Поломництва на Святу Гору Явір

Тогорічны богослужыня на Святій Горі Явір будут вынятковы. То за справом 100. річниці Обявліня ся Лемкам Богородиці. До святкувань рыхтуют ся вірны обоіх Церкви – православны і грекококаликы.

Святочны богослужыня розпочнут вірны православной церкви Всеночном в ганчівскій церкви – в передден праздника свв. Апостолів Петра і Павла. Традицийно одбуде ся і православне піше поломництво – уж ХХХV.

Поломництво зачне ся од св. Літургіі в четвер 10. липця/юлия о 8.00 год. в православній церкви св. Владиміра Великого в Креници. Першого дня поломникы перейдут трасу до Баниці. Другого дня, в пятницю о 8.00 рано на місцевым цмонтери одслуженый буде парастас за помершых жытелів Баниці. Пак поломникы підут через Снітницю, Ставишу і Ріпкы до Ганчовой. О 17.00 год. в велию свята служена буде спомнена Всеночна в церкви Покровы Пресвятой Богородиці в Ганчовій.

В суботу о 7.00 рано, в сам ден праздника, в ганчівскій церкви служеный буде молебен, а пак поломникы перейдут до Высовой. О 9.00 год. при церкви Архістратига Михала в Высовій привитаны будут прибывшы владыкы, а пак вірны выйдут на верх Святой Горы Явір. Свята Літургія на Горі Явір зачне ся о 10.00 год.

Як інформувал владыка Паісий, архієпископ Перемышльскій і Ґорлицкій, архієрейска Літургія буде правлена перед новобудуваном церквом. До нового храму буде внесена ікона св. Паісия Святогорця – дарунок – благословліня Св. Горы Атос православным Лемкам приходячым на нашу Святу Гору.

Окрем пішого, будут і поломництва з другых части державы – приміром з вроцлавско-щеціньской єпархіі ПАПЦ.

Три дни пізнійше зачне ся поломництво вірных грекокатолицкой Церкви. Зачне ся оно в віторок, 15. липця/юлия Божеском Літургійом в церкви в Розділю. Пак поломникы підут на Мацину, через Ропицю Руску до Маластова.

В першый ден заплянувано в сумі 13 км. В середу, 16. липця/юлия вірны перейдут з Маластова через Прислоп до Новиці, де пак переночуют. В четвер, 17. липця/юлия буде найдолша, але послідня част поломництва (20 км). Поломникы з рана выйдут з Новиці і підут через Устя Рускє, Квятон, Ганчову ґу Высовій. А уж в пятницю, 18. липця/юлия одбудут ся головны грекокатолицкы святкуваня на Святій Горі Явір – з самого рана поломникы выйдут на верх Явора.

В тот же ден о 9.30 год. буде одправленый Молебен до Пресвятой Богородиці, а о 10.00 год. зачне ся архієрейска Літургія. Тогорічны святкуваня для Русинів на Лемковині будут о тілько вынятковы, што богослужыня очелит Высокопреосвященный Йона Максим, пряшівскій грекокатолицкій архієпископ і митрополита при сослужыню другых єпископів та священників з Польщы. Про Русинів (Лемків) в тых днях пришла як раз добра віст зо Словациі – Рада єрархів тамтышньой Церкви схвалила русиньскый Літургікон, што значыт, же русиньскій язык стал офіцияльным літургічным языком грекокатолицкой Церкви на Словациі.

По служыню на Яворі, о год. 12.00 на цмонтери в Высовій буде одслужена панахіда при гробі Фіриі Демянчык, якій перед 100 роками обявиля ся Пресвята Богородиця. Деталі о грекокатолицкым поломництві найдете на вебсайті gora-jawor.pl, якій має і лемківску языкову версию.