Сумар дня на 7. липця/юлия 2025 р.

Приносиме вам сумар медияльной ґрупы ЛЕМ.фм+ на ден 7. липця/юлия 2025 р.

Лемківскы орґанізациі упамятнили покійного Богдана Ґамбаля

В минулу суботу 5. липця/юлия на Лемковині упамятняли сме покійного Богдана Ґамбаля, выдатного лемківского діяча, єдного з основателів одновленой ґорлицкой Руской Бурсы і думкодавцю першого лемківского радия ЛЕМ.фм, од котрого смерти выполнило ся 2. липця/юлия 5 років. Перед полудньом на Святій Горі Явір было правлене богослужыня, пак зышли сме ся на споминовій стрічы в Рускій Бурсы в Ґорлицях. Традицийно бл. п. Богдана Ґамбаля упамятнило на західніх землях і Стоваришыня Лемків. В річницю смерти квітя і світило памяти за орґанізацию положыл на любіньскым цмонтери Павел Стафиняк, член любіньского Кружка і заєдно член Стоваришыня «Руска Бурса» в Ґорлицях.

Спільне рыхтуваня Святой Горы до свята

Припоминаме, што уж заран Братство Православной Молодежы Перемышльско-Ґорлицкой Єпархіі просит на спільне рыхтуваня Святой Горы Явір до свята. Шторічный праздник святых апостолів Петра і Павла одбуде ся на Святій Горі Явір уж в найблизшу суботу 12. липця/юлия. В тым році свято буде выняткове, зато же звязане з 100. річницьом Обявліня ся Лемкам Богородиці. Братство просит вшыткых, котры можут помочы, заран, в віторок 8. липця/юлия од 9.00 годины.

14. Русиньска Ватра в Малым Липнику

В найблизшу пятницю 11. липця/юлия зачне ся 14. Русиньска Ватра в Малым Липнику. О 18.00 год. ватру одкрыют дітячы фольклорны колективы, пак буде перегляд лявреатів і участників змаганя Співы мого роду. Пятницьовый проґрам завершыт ся концертом Вечер Русиньскых Голосів о год. 20.30. Проґрам пак буде продолжал школом народного танця і забавом. В суботу брамы фестівалю одкрыют ся о 14.00 год. – будут выставы, коштуваня реґіональной кухні, варштаты, школа танця, прелекциі. Будут і активности про діти. Концерты фольклорных колективіл зачнут ся о год. 16:30. О 22.00 год. буде розпаліня ватры і забава. Фестіваль в неділю закінчыт святочна Літургія в грекокатолицкым храмі свв. Космы і Даміяна та концерт духовной пісні.

Премєровый показ модовой колекциі РУСИНКА

Етноцентр Коросняньской Землі просит в найблизшу суботу 12. липця/юлия на премєровый показ колекциі РУСИНКА Анны Мариі Зыґмунт – візуальной артисткы, котрой модовы проєкты од років лучат модерны формы штукы з дідовизном етнічных меншын. Колекция має быти свого рода продолжыньом етноґрафічных бадань над Лемковином і опус маґнум проєктанткы. То част артистично-дослідничого проєкту Тканина памяти, реализуваного в рамках стипендиі Міністра Культуры і Нацийональной Спадковины. Проєкт інспіруваный кроями, культуром і обрядами Карпатскых Русинів має оддати чест вельокультуровости реґіону погранича, з котрого походит проєктантка. Подія зачне ся о 20.00 год. Премєрі колекциі РУСИНКА буде товаришыл гостинный показ колекциі Бабє Літо Наталиі Дзєдзіц, інспіруваной сельском хыжом і артистичным ремеслом. По показах моды одбуде ся концерт ансамблю Замішанці. Вступне на подію дармо.