Ватікан выдав становиско односно Литмановой

Дікастерія доктріны віры в середу 9-го юла 2025-го року публіковала офіціалне становиско односно маріяньской учтивости на горі Звір в Литмановій, котра розвивала ся в роках 1990 аж 1995 в позязаню із предположеныма зъявлінями Дівы Марії.

Становиско є підписане префектом Дікастерії – кардіналом Віктором Мануелом Фернандезом, і є одповідьов на писмо Высокопреосвященого Йоны Максима, пряшівского архієпіскопа і митрополіты, із 27-го мая того року, в котрім пропоновав уділити nihil obstat (нич не перешкаджать, позн. ред.) „про душпастырьске допроводжіня того феномену“.

Дікастерія успокоїла жадость кір Йоны, котрый вказує за безчісленны „щіры і глубокы сповіді“ і обернутя, і оцінює „многы духовны плоды, котры здобывають путници, якы не переставають тото місце навщівльовати“ і наперек тому, же предположены зъявліня скінчіли перед тридцятьома роками.

Як далше дочітаме ся в становиску Дікастерії, тота аналізовала з тым повязаны посолства. Посолства обсягують „цінны вызвы на обернутя“. Веце з них повзбуджує віруючіх тым, же вказує, же путь Євангелія не є складнов.

В писмі кардінал Фернандез признавать, же обмеджене чісло посолств обсягує „даякы неясны справы і менше зрозумілы части“, но із взятьом до увагы того, што ку припаду наисала доктрінална комісія у 2011-ім році, припущать ся, же то дослідок внутрішнього толкованя предположеных візіонарів.

Дікастерія доктріны віры уділила жаданый nihil obstat, но акцентує, же то не значіть узнаня надприродной правости предположеных зъявлінь, але „уможнює схвалити публічный култ і інформовати віруючіх, же покля хотять, можуть без різіка прияти тоту духовну пропозіцію“.

Гора Звір, над русиньскым селом Литманова, є наймолодше путницьке місце Пряшівской ґрекокатолицькой архієпархії. Меджі роками 1990 аж 1995 ся мала ту трьом молодым візіонарям, дітям, появляти Пречіста Діва.

Литманівска гора Звір є путницькым місцьом од 7-го септембра 2008-го року. Втогдышній пряшівскый архієпіскоп і митрополіта Йоан Бабяк выголосив довтогдышнє місце молитвы на горі Звір за путницьке місце на основі факту, же од 1990-го року до Литмановой путує велике множество людей із Словакії, але і споза граніць, „і многы свідоцтва бісідують о тім, же путници в Литмановій находять страченый покій душы, черьпають Божу поміч, і по тайні покаяня зачінають новый період жывота,“ пише ся в установлюючім декреті.

За головный праздник є встановлена неділя по першій пятніці в місяці авґуст. Гора Звір має од 2010-го року духовный звяз із папсков базиліков Santa Maria Maggiore в Римі, котра є першым і головным маріяньскым храмом.