Сумар дня на 9. липця/юлия 2025 р.

Приносиме вам сумар медияльной ґрупы ЛЕМ.фм+ на ден 9. липця/юлия 2025 р.

Михал Стариньскій знат лемківскій на 100%!

Вчера оголошены были результаты тогорічных матур – обовязковых еґзамінів в Польщы здаваных на конец середньой школы. Приємно нам заявити, што Михал Стариньскій з Ліґниці, котрый як єдиный в Польщы здавал в маю іспыт з лемківского языка, здал тоту матуру на 100%. В бесіді для нашой редакциі признал, што єст барз задоволеный – дальшы еґзаміны тіж пішли му добрі. Михал хоче здавати на психолоґію во Вроцлаві. Тримаме пальці за успіх в тій квестиі і раз іщы – ґратулюєме!

Лемківскій язык на Ягайлоньскым Університеті

Кєд же знаны сут уж результаты матур, абсольвенты можут выберати дальшу пут вчыня. Як заявлят Філолоґічный Выділ Ягайлоньского Університету, урухомленый был набір на унікальный в скали цілой Польщы напрям студий – Карпатскій реґіон: етнолінґвістика і культуровы студиі. «То выняткова нагода, жебы зглубити таємниці Карпат і іх богаты культуры» – чытаме в інформациі. Студенты будут здобывати знаня з такых обшыри як: культурова антрополоґія, реліґійознавство ци етнолінґвістика. Обовязковы будут тіж занятя з языків реґіону: украіньского, румуньского, словацкого, аж і лемківского. В проґрамі занять сут тіж тереновы практикы і баданя. Зголошыня в рекрутацийным системі мож зробити до кінця дня. Оголошыня ранкінґового списку одбуде ся 18. липця/юлия, пак буде найпевнійше оголошеный другій набір – в тым примірі записы будут проходити в терміні до 11. вересня/септембра.

Засідала Світова Рада Русиньской Молодежы

Перед тыжньом, 2. липця/юлия одбыло ся перше в меджеконґресовым періоді засіданя Світовой Рады Русиньской Молодежы, в складі выбраным на проходячым перед нецілым місяцьом в Букарешті Світовым Конґресі Русинів. На онляйновым засіданю Світовой Рады Русиньской Молодежы присутны были Свєтлана Бойчук – представничка Румуніі, Александер Гричко за Словацию, Яна Томкова за Чехы, Срдян Ґовля за Сербію і Іван Лікар за Хорвацию. В порядку засіданя члены Рады м.ін. приняли плян роботы Світового Форуму Русиньской Молодежы за період 2025/2027, выбраный был секретар, рішено о урухомліню профілю Форуму Русиньской Молодежы в соспільных медиях – на сіти Facebook i Iнстаґрамі. Для ліпшой спілпрацы Форум хоче раз на два місяці стрічати ся онляйн. Серед найблизшых активности находят ся м.ін. справы звязаны зо зорґанізуваньом стрічы молодых Русинів в Новым Орахові в січни/януарі 2026 рока, выізд сербско-хорватской делеґациі на Ватру в Малым Липнику в тот вікенд, та сконтактуваня ся з членами Світотой Рады Русинів за Польщу, Украіну і Америку, жебы зголосили своіх членів до Світовой Рады Русиньской Молодежы, в звязку з фактом, што делеґациі молодых з тых держав не были присутны на минулым Світовым Конґресі Русинів в Букарешті.

О нашых церквах в Бурсі

Уж о тыжден, в четвер 17. липця/юлия в Рускій Бурсі в Ґорлицях історик і реґіоналиста Даміян Новак выголосит популярнонауковый выклад на тему долі церкви на Лемковині. Прелекция выголошена буде по польскы. Даміян Новак буде оповідал о церквах не лем як о творах архітектуры, але і в контексті церкви як носителів памяти і доказів вельоверствовых історичных процесів. Вкаже іх як обєкты, котры фунґували на стыку політикы, локальной достоменности і консерваторской практикы. Выклад ілюструваный буде богатым візуальным материялом, котрый вкаже зміны архітектонных форм, а тіж змінніст іх культурного контексту. Част фотоґрафій не была скорше публикувана. Выклад зачне ся о 18.00 год., вступне дармо. Подія буде зреализувана завдякы фінансуваню Міністерством Внутрішніх Справ і Адміністрациі.