Сумар дня на 11. липця/юлия 2025 р.

Приносиме вам сумар медияльной ґрупы ЛЕМ.фм+ на ден 11. липця/юлия 2025 р.

Торжества на Святій Горі Явір

Заран, в суботу 12. липця/юлия, в ден святых Апостолів Петра і Павла, православны Лемкы традицийно зыйдут ся на торжестві на Святій Горі Явір. Тогорічны святкуваня на Святій Горі Явір будут вынятковы, кєд же церков споминат 100. річницю Обявліня ся Лемкам Богородиці. Днес, в велию свята, о 17.00 год. служена буде Всеночна в церкви Покровы Пресвятой Богородиці в Ганчовій. В ден свята, в суботу 12. липця/юлия о 9.00 год. при церкви Архістратига Михала в Высовій привитаны будут прибывшы єпархы, а пак вірны выйдут на верх Святой Горы Явір. Свята Літургія зачне ся о 10.00 год. Як інформувал владыка Паісий, архієпископ Перемышльскій і Ґорлицкій, св. Літургія буде правлена перед новобудуваном церквом. До нового храму буде внесена ікона св. Паісия Святогорця – дарунок – благословліня Св. Горы Атос православным Лемкам приходячым на нашу Святу Гору. З нагоды свята традицийно іде на Святу Гору Явір православне піше поломництво – в тым році уж ХХХV. Поломникы рушыли вчера з Крениці. Окрем пішого, будут і поломництва з другых части державы, приміром з вроцлавско-щецінской єпархіі.

Русиньска Ватра в Малым Липнику

Днес початок 14. Русиньской Ватры в Малым Липнику. О 18.00 год. ватру одкрыют дітячы фольклорны колективы, пак буде перегляд лявреатів і участників змаганя Співы мого роду. Днешній проґрам завершыт ся концертом Вечер Русиньскых Голосів о год. 20.30. Проґрам пак буде продолжал школом народного танця і забавом. Заран, в суботу брамы фестівалю одкрыют ся о 14.00 год. – будут выставы, коштуваня реґіональной кухні, варштаты, школа танця, прелекциі і активности про діти. Концерты фольклорных колективів зачнут ся о год. 16.30. О 22.00 буде розпаліня ватры і забава. Фестіваль в неділю закінчыт святочна Літургія в грекокатолицкым храмі свв. Космы і Даміяна та концерт духовной пісні.

Польскій Сойм принял новелизацию меншынового закону

Польскій Сойм принял новелизацию закону о нацийональных і етнічных меншынах та реґіональным языку. Проєкт уставы, тыкаючый запевніня Канцелярийом Сойму мериторичной і орґанізацийно-правной обслугы для входячых в склад Спільной Комісиі Уряду та Нацийональных і Етнічных Меншын представників нацийональных і етнічных меншын та соспільности хоснуючой реґіоналный язык, был в середу 9. липця/юлия справозданый в Соймі посланкыньом Моніком Росом. Обслуга має быти покрывана з буджету державы, з середків будучых в диспозициі Шефа Канцеляриі Сойму. Новелизация закону єст одповідю на постуляты зголошувaны представниками нацийональных і етнічных меншын, вказуючы на брак мериторично-орґанізацийного заплеча для іх діяня в Спільній Комісиі. За было 238 посланців, проти 16, а 177 стримало ся од голосу. «Завдякы новым переписам нацийональны і етнічны меншыны в Польщы зыскают реальне мериторичне і адміністрацийне спертя при Кацеляриі Сойму. То шанса на ефективный діалоґ з урядом і конец інструментального трактуваня меншын в Політиці» підкрислил Рафал Бартек – ведучый Звязку Німецкых Соспільно-Культуральных Стоваришынь в Польшы. Тепер устава трафит до Сенату, а пак вшытко в руках президента.

«По лемківскы в ґміні Радваниці»

Стоваришыня «Лемківскым Слідом» просит до проєкту «По лемківскы в ґміні Радваниці». В його рамках одбуде ся історично-языкова стріча та лемківскій пікнік при музиці. Заграт ансамбль Вороны. Подія одбуде ся уж заран, в суботу 12. липця/юния в Клембановицях. Початок о 16.00 год. Проєкт буде зреализуваный завдякы фінансовій підпорі Польковицкого Повіту.