100 років од обявлінь Богородиці на Яворі припомнули і грекокатоликы

В 2025 р. минят 100 років од чудесных обявлінь Богородиці на Святій Горі Явір. Місце тото, хоц днес з двома храмами (єден в будові), мимо історичных завірувань, надієме ся, лучыт, як повинно тото быти.

Липец/юлий то од років місяц, в котрым на Яворі служат ся архієрейскы богослужыня, в тым ідут поломництва. 12. липця/юлия на праздник свв. Апостолів Петра і Павла святочны богослужыня справили вірны православной Церкви. О нецілый тыжден, бо 18. липця/юлия 2025 р., 100. річницю обявлінь припомнула грекокатолицка Церков.

Тогорічны богослжыня очелял Высокопреосвященный Йона Максим, пряшівскій грекокатолицкій архієпископ і митрополита при сослужыню другых єпископів та священників. Присутны были всітри правлячы єпископы в Польщы – Євген Попович (митрополита перемышльско-варшавскій), Володимир Ющак (владыка вроцлавско-кошаліньскій) та Аркадий Трохановскій (владыка ольштыньско-ґданьской єпархіі).

Богослужыня зачали ся Молебном до Пресвятой Богородиці, пак была служена Божеска Літургія перед каплицьом.

Владыка Йона Максим, якій завитал на Лемковину, мал в тот ден проповід, котру выголосил по украіньскы. Хоц сама грекокатолицка Церков на Словациі недавно схвалила русиньскій язык як офіцияльный богослужбовый язык для своіх вірных. Пряшівскій митрополита припомнул історию обявлінія, і як владыка з полудньового хырбету Карпат навязал до того, што жена, якій явила ся Богородиця, вертала з Лютины – так само місця, де прославляна є Мати Божа. Владыка в проповіди навязал до фраґменту Євангелиі о Мариі і Марфі. Бесідувал, што гора Явір є місцьом, де мож присісти коло ніг самого Ісуса Христа, вытишыти ся і почути голос Господа, якій знає чловечы болі і печалі.

Пак владыкы служыли панахіду на цмонтери в Высовій при гробі Фіриі Демянчык, якій перед 100. роками обявила ся Пресвята Богородиця. Присутна была правнучка покійной, яка розповіла пару фактів з жытя свойой предкыні.

За традицийом шторічных, літніх богослужынь, і того рока путувало грекокатолицкє поломництво на Святу Гору Явір, якє орґанізувал парох Розділя, Полян і Зындановы, о. Григорий Пацан. Поломникы того рока ішли як раз з Розділя. Другє, молодіжне поломництво, під проводом о. Віталия Бойка і о. Ігоря Процика, ішло з Новиці. Подля перемышльско-варшавской єпархіі, в річницьовым богослужыню взяло участ понад тисяч осіб.

Присутны были вірны не лем з Лемковины, але і поломникы з Пряшівщыны, західніх земель Польщы та Украіны.