Сумар дня на 25. липця/юлия 2025 р.

Приносиме вам сумар медияльной ґрупы ЛЕМ.фм+ на ден 25. липця/юлия 2025 р.

Русиньска культура буде презентувана на One World Day в ЗША

Як поінформувало Карпаторусиньскє Общество (Carpatho-Rusyn Society), котре діє в Зъєднаных Штатах Америкы, 24. серпня/авґуста в Культурных Загородах Клівленд (Cleveland Cultural Gardens) буде проходила шторічна подія з назвом One World Day. Культурны Загороды Клівленд то в сумі 35 публичных загорід, якы репрезентуют культурну дідовизну ріжных ґруп іміґрантів, якы од віків творят спадковину Зъєднаных Штатів Америкы і Клівленд. Перша з них была основана в 1916 р. Од 1939 р. находит ся там і Карпаторусиньска Загорода, в 1952 р. был там поставленый памятник будителя Александра Духновича. На тогорічній подіі присутне буде одділіня Карпаторусиньского Общества в Клівленд, а в Карпаторусиньскій Загороді одбуде ся специяльный выступ танцювальной ґрупы Living Tradition Folk Dancers. Повитальный центр тогорічной, 79. едициі One World Day буде ся находил в нижній части Карпаторусиньской Загороды, што позволит на шыроку презентацию русиньской дідовизны, кєд же подія притігат каждого рока понад 30 000 одвиджаючых. Вступне на подію дармо.

«Од Русаль до Яна» в Музею Лемківской Культуры в Зындрановій

В тот вікенд на Лемковині буде проходило дакілько подій звязаных з лемківском культуром. Першом з них єст шторічна подія «Од Русаль до Яна», яка пройде в найблизшый вікенд 26.-27. липця/юлия в Музею Лемківской Культуры в Зындрановій. В рамках суботнього проґраму, од 16.00 год. буде мож м.ін. звидіти Музей Лемківской Культуры в Зындрановій, взяти участ в прелекциях і промоциі книжок. О 18.00 год. зачнут ся выступы ансамблів – буде Капеля спід Рубані та Hudobná Skupina Alegro. По концерті буде розпалене огниско. В неділю о 11.00 год. одслужена буде св. Літургія в церкви св. Миколая в Зындрановій, а пак пройде офіцийна част одкрытя свята і концерт. Выступлят: Ленчанє, Серенча, Стропковяне, Стропковчан, Чендеш Орхестра і Капеля знад Ославы. Окрем того заплянувано другы атракциі, такы як показы ремесла і конкурсы.

Варштаты тыкаючы лемківской культуры в Бортным

Так само в найблизшый вікенд в колибі в Бортным будут одбывати ся безплатны варштаты тыкаючы лемківской культуры. Прелекцию о істориі Лемків проведе Бортнян – Еміль Каня, він так само розповіст о камінярці, з котрого ремесла славне єст Бортне, і поведе прогульком по селі – слідом капличок, церкви і хыж. Місцевы ґаздыні вкажут тіж, як рыхтувати лемківскы традицийны стравы і як вышывати. На суботу заплянуване єст тіж огниско з лемківскыма співами. Детальный проґрам найдете на фейсбуковым сайті орґанізатора – колибы в Бортным (Schronisko Bartne).

Театральный фестіваль в Ждыни

Окрем того од четверга в Ждыни проходит друга едиция театрального фестівалю Ujście Kultury – Teatr i Góry, на котрый просит Меджепоколіньова Театральна Ґрупа Племя. До кінця того тыжня і од 1. до 3. серпня/авґуста, на обшыри Ватры одбудут ся показы спектаклів: 84, Бомбель, Бескідскы Дзяды та Ґміна Ґжешне. В рамках додатковых подій заран о 23.00 год. одбуде ся гулянка з музиком нажыво – пригрывал буде ансамбль Серенча. Деталі найдете в дописі на нашым портали в закладці подіі.

Джерело фотоґрафіі: Carpatho-Rusyn Society